[562] Tena kho pana samayena chabbaggiyā bhikkhuniyo bhikkhuṃ passitvā parivattetvā pattamūlaṃ dassenti . te bhikkhū ujjhāyanti khīyanti vipācenti kathaṃ hi nāma chabbaggiyā bhikkhuniyo bhikkhuṃ passitvā parivattetvā pattamūlaṃ dassessantīti . athakho te bhagavato etamatthaṃ ārocesuṃ .pe. na bhikkhave bhikkhuniyā bhikkhuṃ passitvā parivattetvā pattamūlaṃ dassetabbaṃ yā dasseyya āpatti dukkaṭassa anujānāmi bhikkhave bhikkhuniyā bhikkhuṃ passitvā ukkujjitvā pattaṃ dassetuṃ yañca patte āmisaṃ hoti tena ca bhikkhu nimantetabboti.

[563] Tena kho pana samayena sāvatthiyā rathikāya purisabyañjanaṃ chaḍḍitaṃ hoti . taṃ bhikkhuniyo sakkaccaṃ upanijjhāyiṃsu . manussā ukkuṭṭhimakaṃsu . tā bhikkhuniyo maṅkū ahesuṃ . athakho tā bhikkhuniyo upassayaṃ gantvā bhikkhunīnaṃ etamatthaṃ ārocesuṃ . yā tā bhikkhuniyo Appicchā .pe. tā ujjhāyanti khīyanti vipācenti kathaṃ hi nāma bhikkhuniyo purisabyañjanaṃ upanijjhāyissantīti . athakho tā bhikkhuniyo bhikkhūnaṃ etamatthaṃ ārocesuṃ .pe. bhagavato etamatthaṃ ārocesuṃ . na bhikkhave bhikkhuniyā purisabyañjanaṃ upanijjhāyitabbaṃ yā upanijjhāyeyya āpatti dukkaṭassāti.

[564] Tena kho pana samayena manussā bhikkhūnaṃ āmisaṃ denti. Bhikkhū bhikkhunīnaṃ denti . manussā ujjhāyanti khīyanti vipācenti kathaṃ hi nāma bhaddantā attano paribhogatthāya dinnaṃ aññesaṃ dassanti na mayampi jānāma dānaṃ dātunti . bhagavato etamatthaṃ ārocesuṃ . na bhikkhave attano paribhogatthāya dinnaṃ aññesaṃ dātabbaṃ yo dadeyya āpatti dukkaṭassāti.

[565] Tena kho pana samayena bhikkhūnaṃ āmisaṃ ussannaṃ hoti. Bhagavato etamatthaṃ ārocesuṃ . anujānāmi bhikkhave saṅghassa dātunti. Bāḷhataraṃ ussannaṃ hoti . bhagavato etamatthaṃ ārocesuṃ . Anujānāmi bhikkhave puggalikaṃpi dātunti.