[63] Tena kho pana samayena bhikkhū cīvaraṃ sibbentā aṅguliyā paṭiggaṇhanti . aṅguliyo dukkhā honti . bhagavato etamatthaṃ ārocesuṃ .pe. Anujānāmi bhikkhave paṭiggahanti.

[64] Tena kho pana samayena chabbaggiyā bhikkhū uccāvace paṭiggahe dhārenti sovaṇṇamayaṃ rūpiyamayaṃ . manussā ujjhāyanti khīyanti vipācenti .pe. seyyathāpi gihī kāmabhoginoti . bhagavato etamatthaṃ ārocesuṃ .pe. na bhikkhave uccāvacā paṭiggahā dhāretabbā yo dhāreyya āpatti dukkaṭassa anujānāmi bhikkhave aṭṭhimayaṃ .pe. Saṅkhanābhimayanti.

[65] Tena kho pana samayena sūciyopi satthakāpi paṭiggahāpi nassanti. Bhagavato etamatthaṃ ārocesuṃ . anujānāmi bhikkhave āvesanavitthakanti. Āvesanavitthake samākulā honti . bhagavato etamatthaṃ ārocesuṃ . Anujānāmi bhikkhave paṭiggahatthavikanti . aṃsavaddhako na hoti .pe. Anujānāmi bhikkhave aṃsavaddhakaṃ bandhanasuttakanti.

[66] Tena kho pana samayena bhikkhū ajjhokāse cīvaraṃ sibbentā sītenapi uṇhenapi kilamanti . bhagavato etamatthaṃ ārocesuṃ . anujānāmi bhikkhave kaṭhinasālaṃ kaṭhinamaṇḍapanti . Kaṭhinasālā nīcavatthukā hoti . udakena otthariyanti . bhagavato etamatthaṃ ārocesuṃ . anujānāmi bhikkhave uccavatthukaṃ kātunti . Cayo paripatati . anujānāmi bhikkhave cinituṃ tayo caye iṭṭhakācayaṃ silācayaṃ dārucayanti . ārohantā vihaññanti .pe. anujānāmi bhikkhave tayo sopāṇe iṭṭhakāsopāṇaṃ silāsopāṇaṃ dārusopāṇanti . ārohantā paripatanti .pe. anujānāmi bhikkhave ālambanabāhanti.