[596] Byattena bhikkhunā paṭibalena saṅgho ñāpetabbo {596.1} suṇātu me bhante saṅgho itthannāmā itthannāmāya upasampadāpekkhā ekatoupasampannā bhikkhunīsaṅghe visuddhā sā kenacideva antarāyena nāgacchati itthannāmā saṅghaṃ upasampadaṃ yācati itthannāmāya pavattiniyā . yadi saṅghassa pattakallaṃ saṅgho itthannāmaṃ upasampādeyya itthannāmāya pavattiniyā. Esā ñatti. {596.2} Suṇātu me bhante saṅgho itthannāmā itthannāmāya upasampadāpekkhā ekatoupasampannā bhikkhunīsaṅghe visuddhā sā kenacideva antarāyena nāgacchati itthannāmā saṅghaṃ upasampadaṃ yācati itthannāmāya pavattiniyā . saṅgho itthannāmaṃ upasampādeti itthannāmāya pavattiniyā . yassāyasmato khamati itthannāmāya upasampadā itthannāmāya pavattiniyā so tuṇhassa yassa nakkhamati so bhāseyya. {596.3} Dutiyampi etamatthaṃ vadāmi .pe. tatiyampi etamatthaṃ vadāmi . suṇātu me bhante saṅgho itthannāmā itthannāmāya upasampadāpekkhā ekatoupasampannā bhikkhunīsaṅghe visuddhā sā kenacideva antarāyena nāgacchati itthannāmā saṅghaṃ upasampadaṃ yācati itthannāmāya pavattiniyā . saṅgho itthannāmaṃ upasampādeti itthannāmāya pavattiniyā . yassāyasmato khamati itthannāmāya upasampadā itthannāmāya pavattiniyā so tuṇhassa Yassa nakkhamati so bhāseyya. {596.4} Upasampannā saṅghena itthannāmā itthannāmāya pavattiniyā . khamati saṅghassa tasmā tuṇhī . evametaṃ dhārayāmīti. Tāvadeva chāyā metabbā utuppamāṇaṃ ācikkhitabbaṃ divasabhāgo ācikkhitabbo saṅgīti ācikkhitabbā bhikkhuniyo vattabbā tassā tayo ca nissaye aṭṭha ca akaraṇīyāni ācikkheyyāthāti.