[643] Assosuṃ kho vesālikā vajjiputtakā bhikkhū yaso kira kākaṇḍakaputto imaṃ adhikaraṇaṃ ādiyitukāmo pakkhaṃ pariyesati labhati ca kira pakkhanti . athakho vesālikānaṃ vajjiputtakānaṃ bhikkhūnaṃ etadahosi idaṃ kho adhikaraṇaṃ kakkhaḷañca vāḷañca kaṃ nu kho mayaṃ pakkhaṃ labheyyāma yena mayaṃ imasmiṃ adhikaraṇe balavantatarā assāmāti . athakho vesālikānaṃ vajjiputtakānaṃ bhikkhūnaṃ etadahosi ayaṃ kho āyasmā revato bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo sace mayaṃ āyasmantaṃ revataṃ pakkhaṃ labheyyāma evaṃ mayaṃ imasmiṃ adhikaraṇe balavantatarā assāmāti . athakho vesālikā vajjiputtakā bhikkhū pahūtaṃ sāmaṇakaṃ parikkhāraṃ paṭiyādesuṃ pattampi cīvarampi nisīdanampi sūcigharampi kāyabandhanampi parissāvanampi dhamakarakampi . athakho vesālikā vajjiputtakā bhikkhū taṃ sāmaṇakaṃ parikkhāraṃ ādāya nāvāya sahajātiṃ ujjaviṃsu nāvāya paccorohitvā aññatarasmiṃ Rukkhamūle bhattavissaggaṃ karonti.