[646] Athakho saṅgho taṃ adhikaraṇaṃ vinicchinitukāmo sannipati . Athakho āyasmā revato saṅghaṃ ñāpesi suṇātu me āvuso saṅgho sace mayaṃ imaṃ adhikaraṇaṃ idha vūpasamessāma siyāpi mūlādāyakā bhikkhū punakkammāya ukkoṭeyyuṃ . yadi saṅghassa pattakallaṃ yatthevimaṃ adhikaraṇaṃ samuppannaṃ saṅgho tatthevimaṃ Adhikaraṇaṃ vūpasameyyāti . athakho therā bhikkhū vesāliṃ agamaṃsu taṃ adhikaraṇaṃ vinicchinitukāmā . tena kho pana samayena sabbakāmī nāma paṭhabyā saṅghatthero vīsavassasatiko upasampadāya āyasmato ānandassa saddhivihāriko vesāliyaṃ paṭivasati . athakho āyasmā revato āyasmantaṃ sambhūtaṃ sāṇavāsiṃ etadavoca ahaṃ āvuso yasmiṃ vihāre sabbakāmī thero viharati taṃ vihāraṃ upagacchāmi so tvaṃ kālasseva āyasmantaṃ sabbakāmiṃ upasaṅkamitvā imāni dasa vatthūni puccheyyāsīti . evaṃ bhanteti kho āyasmā sambhūto sāṇavāsī āyasmato revatassa paccassosi . athakho āyasmā revato yasmiṃ vihāre sabbakāmī thero viharati taṃ vihāraṃ upagañchi . gabbhe āyasmato sabbakāmissa senāsanaṃ paññattaṃ hoti . gabbhapamukhe āyasmato revatassa . athakho āyasmā revato ayaṃ thero mahallako na nipajjatīti na seyyaṃ kappeti . āyasmā sabbakāmī ayaṃ bhikkhu āgantuko kilanto na nipajjatīti na seyyaṃ kappesi.

[647] Athakho āyasmā sabbakāmī rattiyā paccūsasamayaṃ paccuṭṭhāya āyasmantaṃ revataṃ etadavoca katamena tvaṃ bhummi vihārena etarahi bahulaṃ viharasīti . mettāvihārena kho ahaṃ bhante etarahi bahulaṃ viharāmīti . kullakavihārena kira tvaṃ bhummi etarahi bahulaṃ Viharasi kullakavihāro heso bhummi yadidaṃ mettāti . pubbepi me bhante gihibhūtassa āciṇṇā mettā tenāhaṃ etarahipi mettāvihārena bahulaṃ viharāmi apica mayā cirappattaṃ arahattaṃ thero pana bhante katamena vihārena etarahi bahulaṃ viharatīti . Suññatāvihārena kho ahaṃ bhummi etarahi bahulaṃ viharāmīti . Mahāpurisavihārena kira bhante thero etarahi bahulaṃ viharati mahāpurisavihāro eso bhante yadidaṃ suññatāti . pubbepi me bhummi gihibhūtassa āciṇṇā suññatā tenāhaṃ etarahipi suññatāvihārena bahulaṃ viharāmi apica mayā cirappattaṃ arahattanti.