[82] Tena kho pana samayena bhikkhū caṅkame caṅkamantā paripatanti . bhagavato etamatthaṃ ārocesuṃ . anujānāmi bhikkhave caṅkamanavedikanti.

[83] Tena kho pana samayena bhikkhū ajjhokāse caṅkamantā sītenapi uṇhenapi kilamanti . bhagavato etamatthaṃ ārocesuṃ . Anujānāmi bhikkhave caṅkamanasālanti . caṅkamanasālāyaṃ tiṇacuṇṇaṃ paripatati .pe. anujānāmi bhikkhave ogumbetvā ullittāvalittaṃ kātuṃ setavaṇṇaṃ kāḷavaṇṇaṃ gerukaparikammaṃ mālākammaṃ latākammaṃ makaradantakaṃ pañcapaṭṭhikaṃ cīvaravaṃsaṃ cīvararajjunti.

[84] Tena kho pana samayena jantāgharaṃ nīcavatthukaṃ hoti. Udakena otthariyati .pe. anujānāmi bhikkhave uccavatthukaṃ kātunti . cayo paripatati .pe. anujānāmi bhikkhave cinituṃ tayo caye iṭṭhakācayaṃ silācayaṃ dārucayanti . ārohantā vihaññanti .pe. anujānāmi bhikkhave tayo sopāṇe iṭṭhakāsopāṇaṃ silāsopāṇaṃ dāru- sopāṇanti . ārohantā paripatanti .pe. anujānāmi bhikkhave Ālambanabāhanti . jantāgharassa kavāṭaṃ na hoti .pe. anujānāmi bhikkhave kavāṭaṃ piṭṭhasaṅghāṭaṃ udukkhalikaṃ uttarapāsakaṃ aggaḷavaṭṭiṃ kapisīsakaṃ sūcikaṃ ghaṭikaṃ tālacchiddaṃ āviñchanacchiddaṃ āviñchanarajjunti . Jantāgharassa kuḍḍapādo jīrati . bhagavato etamatthaṃ ārocesuṃ . Anujānāmi bhikkhave maṇḍalikaṃ kātunti . jantāgharassa dhūmanettaṃ na hoti .pe. Anujānāmi bhikkhave dhūmanettanti.

[85] Tena kho pana samayena bhikkhū khuddake jantāghare majjhe aggiṭṭhānaṃ karonti . upacāro na hoti .pe. anujānāmi bhikkhave khuddake jantāghare ekamantaṃ aggiṭṭhānaṃ kātuṃ mahallake majjheti . jantāghare aggi mukhaṃ ḍahati .pe. anujānāmi bhikkhave mukhamattikanti . hatthena mattikaṃ tementi .pe. anujānāmi bhikkhave mattikādoṇikanti . mattikā duggandhā honti .pe. Anujānāmi bhikkhave vāsetunti.