[94] Tena kho pana samayena jantāghare udakaṃ na hoti . Bhagavato etamatthaṃ ārocesuṃ . anujānāmi bhikkhave udapānanti . Udapānassa kūlaṃ lujjati .pe. anujānāmi bhikkhave cinituṃ tayo caye iṭṭhakācayaṃ silācayaṃ dārucayanti . udapāno nīcavatthuko hoti . udakena otthariyati . bhagavato etamatthaṃ ārocesuṃ . Anujānāmi bhikkhave uccavatthukaṃ kātunti . cayo paripatati .pe. Ārohantā vihaññanti .pe. ārohantā paripatanti .pe. Anujānāmi bhikkhave ālambanabāhanti.

[95] Tena kho pana samayena bhikkhū valliyāpi kāyabandhanenapi udakaṃ vāhenti .pe. anujānāmi bhikkhave udapānarajjunti . Hatthā dukkhā honti .pe. anujānāmi bhikkhave tulaṃ karakaṭakaṃ cakkavaṭṭakanti . bhājanā bahū bhijjanti .pe. anujānāmi bhikkhave tayo vārake lohavārakaṃ dāruvārakaṃ cammakhaṇḍanti.

[96] Tena kho pana samayena bhikkhū ajjhokāse udakaṃ vāhentā sītenapi uṇhenapi kilamanti . bhagavato etamatthaṃ ārocesuṃ . Anujānāmi bhikkhave udapānasālanti . udapānasālāya tiṇacuṇṇaṃ paripatati .pe. anujānāmi bhikkhave ogumbetvā ullittāvalittaṃ kātuṃ setavaṇṇaṃ kāḷavaṇṇaṃ gerukaparikammaṃ mālākammaṃ latākammaṃ makaradantakaṃ pañcapaṭṭhikaṃ cīvaravaṃsaṃ cīvararajjunti.

[97] Tena kho pana samayena udapāno apāruto hoti . Tiṇacuṇṇehipi paṃsukehipi okiriyati .pe. anujānāmi bhikkhave apidhānanti.