[122] Athakho bhagavā pubbaṇhasamayaṃ nivāsetvā pattacīvaramādāya yena bodhissa rājakumārassa nivesanaṃ tenupasaṅkami . tena kho pana samayena bodhi rājakumāro bahidvārakoṭṭhake ṭhito hoti bhagavantaṃ āgamayamāno . addasā kho bodhi rājakumāro bhagavantaṃ dūrato va āgacchantaṃ disvāna tato paccuggantvā bhagavantaṃ abhivādetvā purakkhitvā yena kokanudo pāsādo tenupasaṅkami . athakho bhagavā pacchimaṃ sopāṇakaḷevaraṃ nissāya aṭṭhāsi . athakho bodhi rājakumāro bhagavantaṃ etadavoca akkamatu bhante bhagavā dussāni akkamatu bhante sugato dussāni yaṃ mama assa dīgharattaṃ hitāya sukhāyāti . evaṃ vutte bhagavā tuṇhī ahosi . dutiyampi kho .pe. tatiyampi kho bodhi rājakumāro bhagavantaṃ etadavoca akkamatu bhante bhagavā dussāni Akkamatu bhante sugato dussāni yaṃ mama assa dīgharattaṃ hitāya sukhāyāti. {122.1} Athakho bhagavā āyasmantaṃ ānandaṃ avalokesi . Athakho āyasmā ānando bodhiṃ rājakumāraṃ etadavoca saṃharatu rājakumāra dussāni na bhagavā ceḷapaṭikaṃ akkamissati pacchimaṃ janataṃ tathāgato anukampatīti . athakho bodhi rājakumāro dussāni saṃharāpetvā upari kokanude pāsāde āsanaṃ paññāpesi . Athakho bhagavā kokanudaṃ pāsādaṃ abhiruyhitvā paññatte āsane nisīdi saddhiṃ bhikkhusaṅghena . athakho bodhi rājakumāro buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappetvā sampavāretvā bhagavantaṃ bhuttāviṃ onītapattapāṇiṃ ekamantaṃ nisīdi . Ekamantaṃ nisinnaṃ kho bodhiṃ rājakumāraṃ bhagavā dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi.

[123] Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi na bhikkhave ceḷapaṭikā akkamitabbā yo akkameyya āpatti dukkaṭassāti.