[163] Tena kho pana samayena aññataro bhikkhu akāyabandhano gāmaṃ piṇḍāya pāvisi . tassa rathiyā antaravāsako pabhassittha. Manussā passitvā ukkuṭṭhimakaṃsu . so bhikkhu maṅku ahosi . Athakho so bhikkhu ārāmaṃ gantvā bhikkhūnaṃ etamatthaṃ ārocesi . Bhikkhū bhagavato etamatthaṃ ārocesuṃ .pe. na bhikkhave akāyabandhanena gāmo pavisitabbo yo paviseyya āpatti dukkaṭassa anujānāmi bhikkhave kāyabandhananti.

[164] Tena kho pana samayena chabbaggiyā bhikkhū uccāvacāni kāyabandhanāni dhārenti kalābukaṃ deḍḍubhakaṃ murajjaṃ maddaviṇaṃ . Manussā ujjhāyanti khīyanti vipācenti .pe. seyyathāpi gihī kāmabhoginoti .pe. bhagavato etamatthaṃ ārocesuṃ .pe. na bhikkhave uccāvacāni kāyabandhanāni dhāretabbāni kalābukaṃ deḍḍubhakaṃ murajjaṃ maddaviṇaṃ yo dhāreyya āpatti dukkaṭassa anujānāmi bhikkhave dve kāyabandhanāni paṭṭikaṃ sūkarantakanti .pe. kāyabandhanassa dasā jiranti .pe. anujānāmi bhikkhave murajjaṃ maddaviṇanti . Kāyabandhanassa anto jirati .pe. anujānāmi bhikkhave sobhakaṃ gaṇakanti . kāyabandhanassa pavananto jirati .pe. anujānāmi bhikkhave vithanti .

[165] Tena kho pana samayena chabbaggiyā bhikkhū uccāvace vithe dhārenti sovaṇṇamayaṃ rūpiyamayaṃ . manussā ujjhāyanti Khīyanti vipācenti .pe. seyyathāpi gihī kāmabhoginoti .pe. Bhagavato etamatthaṃ ārocesuṃ .pe. na bhikkhave uccāvacā vithā dhāretabbā yo dhāreyya āpatti dukkaṭassa anujānāmi bhikkhave vithe aṭṭhimayaṃ dantamayaṃ visāṇamayaṃ naḷamayaṃ veḷumayaṃ .pe. Saṅkhanābhimayaṃ suttamayanti.

[166] Tena kho pana samayena āyasmā ānando lahukā saṅghāṭiyo pārupitvā gāmaṃ piṇḍāya pāvisi . Tassa vātamaṇḍalikāya saṅghāṭiyo ukkhipiyiṃsu . athakho āyasmā ānando ārāmaṃ gantvā bhikkhūnaṃ etamatthaṃ ārocesi . bhikkhū bhagavato etamatthaṃ ārocesuṃ .pe. Anujānāmi bhikkhave gaṇṭhikaṃ pāsakanti.