[167] Tena kho pana samayena chabbaggiyā bhikkhū uccāvacā gaṇṭhikāyo dhārenti sovaṇṇamayaṃ rūpiyamayaṃ . manussā ujjhāyanti khīyanti vipācenti .pe. seyyathāpi gihī kāmabhoginoti .pe. Bhagavato etamatthaṃ ārocesuṃ .pe. na bhikkhave uccāvacā gaṇṭhikā dhāretabbā yo dhāreyya āpatti dukkaṭassa anujānāmi bhikkhave gaṇṭhikaṃ aṭṭhimayaṃ dantamayaṃ visāṇamayaṃ naḷamayaṃ veḷumayaṃ kaṭṭhamayaṃ jatumayaṃ phalamayaṃ lohamayaṃ saṅkhanābhimayaṃ suttamayanti.

[168] Tena kho pana samayena bhikkhū gaṇṭhikampi pāsakampi Cīvare appenti . cīvaraṃ jīrati . bhagavato etamatthaṃ ārocesuṃ .pe. Anujānāmi bhikkhave gaṇṭhikaphalakaṃ pāsakaphalakanti . gaṇṭhikaphalakampi pāsakaphalakampi ante appenti . koṇo vivariyati . bhagavato etamatthaṃ ārocesuṃ .pe. anujānāmi bhikkhave gaṇṭhikaphalakaṃ ante appetuṃ pāsakaphalakaṃ sattaṅgulaṃ vā aṭṭhaṅgulaṃ vā ogāhetvā appetunti.