[169] Tena kho pana samayena chabbaggiyā bhikkhū gihinivatthaṃ nivāsenti hatthisoṇḍikaṃ macchavāḷakaṃ catukkaṇṇakaṃ tālavaṇṭakaṃ satavallikaṃ . manussā ujjhāyanti khīyanti vipācenti .pe. Seyyathāpi gihī kāmabhoginoti .pe. bhagavato etamatthaṃ ārocesuṃ .pe. na bhikkhave gihinivatthaṃ nivāsetabbaṃ hatthisoṇḍikaṃ macchavāḷakaṃ catukkaṇṇakaṃ tālavaṇṭakaṃ satavallikaṃ yo nivāseyya āpatti dukkaṭassāti.

[170] Tena kho pana samayena chabbaggiyā bhikkhū gihipārutaṃ pārupanti . manussā ujjhāyanti khīyanti vipācenti .pe. Seyyathāpi gihī kāmabhoginoti .pe. bhagavato etamatthaṃ ārocesuṃ .pe. na bhikkhave gihipārutaṃ pārupitabbaṃ yo pārupeyya āpatti dukkaṭassāti.

[171] Tena kho samayena chabbaggiyā bhikkhū saṃvelliyaṃ nivāsenti . manussā ujjhāyanti khīyanti vipācenti .pe. Seyyathāpi rañño muṇḍavaṭṭīti .pe. bhagavato etamatthaṃ ārocesuṃ .pe. na bhikkhave saṃvelliyaṃ nivāsetabbaṃ yo nivāseyya āpatti dukkaṭassāti.

[172] Tena kho pana samayena chabbaggiyā bhikkhū ubhatokājaṃ haranti . manussā ujjhāyanti khīyanti vipācenti .pe. seyyathāpi rañño muṇḍavaṭṭīti .pe. bhagavato etamatthaṃ ārocesuṃ .pe. Na bhikkhave ubhatokājaṃ haritabbaṃ yo hareyya āpatti dukkaṭassa anujānāmi bhikkhave ekatokājaṃ antarākājaṃ sīsabhāraṃ khandhabhāraṃ kaṭibhāraṃ olambakanti.