[241] Tena kho pana samayena anāthapiṇḍiko gahapati rājagahakassa seṭṭhissa bhaginīpatiko hoti . athakho anāthapiṇḍiko gahapati rājagahaṃ agamāsi kenacideva karaṇīyena.

[242] Tena kho pana samayena rājagahakena seṭṭhinā svātanāya buddhappamukho saṅgho nimantito hoti . athakho rājagahako seṭṭhī dāse ca kammakare ca āṇāpesi tenahi bhaṇe kālasseva uṭṭhāya yāguyo pacatha bhattāni pacatha sūpāni sampādetha uttaribhaṅgāni sampādethāti.

[243] Athakho anāthapiṇḍikassa gahapatissa etadahosi pubbe Khvāyaṃ gahapati mayi āgate sabbakiccāni nikkhipitvā mamaññeva saddhiṃ paṭisammodi sodānāyaṃ vikkhittarūpo dāse ca kammakare ca āṇāpesi tenahi bhaṇe kālasseva uṭṭhāya yāguyo pacatha bhattāni pacatha sūpāni sampādetha uttaribhaṅgāni sampādethāti kinnu kho imassa gahapatissa āvāho vā bhavissati vivāho vā bhavissati mahāyañño vā paccupaṭṭhito rājā vā māgadho seniyo bimbisāro nimantito svātanāya saddhiṃ balanikāyenāti .

[244] Athakho rājagahako seṭṭhī dāse ca kammakare ca āṇāpetvā yena anāthapiṇḍiko gahapati tenupasaṅkami upasaṅkamitvā anāthapiṇḍikena gahapatinā saddhiṃ paṭisammoditvā ekamantaṃ nisīdi . ekamantaṃ nisinnaṃ kho rājagahakaṃ seṭṭhiṃ anāthapiṇḍiko gahapati etadavoca pubbe kho tvaṃ gahapati mayi āgate sabbakiccāni nikkhipitvā mamaññeva saddhiṃ paṭisammodasi sodāni tvaṃ vikkhittarūpo dāse ca kammakare ca āṇāpesi tenahi bhaṇe kālasseva uṭṭhāya yāguyo pacatha bhattāni pacatha sūpāni sampādetha uttaribhaṅgāni sampādethāti kinnu kho te gahapati āvāho vā bhavissati vivāho vā bhavissati mahāyañño vā paccupaṭṭhito rājā vā māgadho seniyo bimbisāro nimantito svātanāya saddhiṃ balanikāyenāti . na me kho gahapati Āvāho vā bhavissati napi vivāho vā bhavissati napi rājā māgadho seniyo bimbisāro nimantito svātanāya saddhiṃ balanikāyena apica me mahāyañño paccupaṭṭhito svātanāya buddhappamukho saṅgho nimantitoti . buddhoti tvaṃ gahapati vadesīti . Buddhotāhaṃ gahapati vadāmīti . buddhoti tvaṃ gahapati vadesīti . Buddhotāhaṃ gahapati vadāmīti . buddhoti tvaṃ gahapati vadesīti . Buddhotāhaṃ gahapati vadāmīti . ghosopi kho eso gahapati dullabho lokasmiṃ yadidaṃ buddhoti . sakkā nu kho gahapati imaṃ kālaṃ taṃ bhagavantaṃ dassanāya upasaṅkamituṃ arahantaṃ sammāsambuddhanti . Akālo kho gahapati imaṃ kālaṃ taṃ bhagavantaṃ dassanāya upasaṅkamituṃ arahantaṃ sammāsambuddhaṃ svedāni tvaṃ kālena taṃ bhagavantaṃ dassanāya upasaṅkamissasi arahantaṃ sammāsambuddhanti.