[245] Athakho anāthapiṇḍiko gahapati svedānāhaṃ kālena taṃ bhagavantaṃ dassanāya upasaṅkamissāmi arahantaṃ sammāsambuddhanti buddhagatāya satiyā nipajji rattiyā sudaṃ tikkhattuṃ uṭṭhāsi pabhātaṃ maññamāno . athakho anāthapiṇḍiko gahapati yena sītavanadvāraṃ tenupasaṅkami . amanussā dvāraṃ vivariṃsu . athakho anāthapiṇḍikassa gahapatissa nagaramhā nikkhamantassa āloko antaradhāyi . Andhakāro pāturahosi . bhayaṃ chambhitattaṃ lomahaṃso udapādi . Tato va nivattitukāmo ahosi.

[246] Athakho sīvako yakkho antarahito saddamanussāvesi sataṃ hatthī sataṃ assā sataṃ assatarīrathā sataṃ kaññā sahassāni āmuttamaṇikuṇḍalā ekassa padavītihārassa kalaṃ nāgghanti soḷasiṃ . Abhikkama gahapati abhikkama gahapati abhikkantante seyyo no paṭikkantanti.

[247] Athakho anāthapiṇḍikassa gahapatissa andhakāro antaradhāyi . āloko pāturahosi . yaṃ ahosi bhayaṃ chambhitattaṃ lomahaṃso so paṭippassambhi . dutiyampi kho .pe. tatiyampi kho anāthapiṇḍikassa gahapatissa āloko antaradhāyi . andhakāro pāturahosi . bhayaṃ chambhitattaṃ lomahaṃso udapādi . tato va puna nivattitukāmo ahosi . tatiyampi kho sīvako yakkho antarahito saddamanussāvesi sataṃ hatthī sataṃ assā sataṃ assatarīrathā sataṃ kaññā sahassāni āmuttamaṇikuṇḍalā ekassa padavītihārassa kalaṃ nāgghanti soḷasiṃ . Abhikkama gahapati abhikkama gahapati abhikkantante seyyo no paṭikkantanti . tatiyampi kho anāthapiṇḍikassa gahapatissa andhakāro Antaradhāyi . āloko pāturahosi . yaṃ ahosi bhayaṃ chambhitattaṃ lomahaṃso so paṭippassambhi . athakho anāthapiṇḍiko gahapati yena sītavanaṃ tenupasaṅkami.