[256] Tena kho pana samayena anāthapiṇḍiko gahapati bahumitto hoti bahusahāyo ādeyyavāco . athakho anāthapiṇḍiko gahapati rājagahe taṃ karaṇīyaṃ tīretvā yena sāvatthī tena pakkāmi . Athakho anāthapiṇḍiko gahapati antarāmagge manusse āṇāpesi Ārāme ayyā karotha vihāre patiṭṭhāpetha dānāni paṭṭhapetha idāni buddho loke uppanno so ca mayā bhagavā nimantito iminā maggena āgacchissatīti . athakho te manussā anāthapiṇḍikena gahapatinā uyyojitā ārāme akaṃsu vihāre patiṭṭhāpesuṃ dānāni paṭṭhapesuṃ . athakho anāthapiṇḍiko gahapati sāvatthiṃ gantvā samantā sāvatthiṃ anuvilokesi kattha nu kho bhagavā vihareyya yaṃ assa gāmato neva atidūre na accāsanne gamanāgamanasampannaṃ atthikānaṃ atthikānaṃ manussānaṃ abhikkamanīyaṃ divā appākiṇṇaṃ rattiṃ appasaddaṃ appanigghosaṃ vijanavātaṃ manussarāhaseyyakaṃ paṭisallānasāruppanti. {256.1} Addasā kho anāthapiṇḍiko gahapati jetassa rājakumārassa uyyānaṃ gāmato neva atidūre na accāsanne gamanāgamanasampannaṃ atthikānaṃ atthikānaṃ manussānaṃ abhikkamanīyaṃ divā appākiṇṇaṃ rattiṃ appasaddaṃ appanigghosaṃ vijanavātaṃ manussarāhaseyyakaṃ paṭisallānasāruppaṃ disvāna yena jeto rājakumāro tenupasaṅkami upasaṅkamitvā jetaṃ rājakumāraṃ etadavoca dehi me ayyaputta uyyānaṃ ārāmaṃ kātunti . Adeyyo gahapati ārāmo api koṭisantharenāti . gahito ayyaputta ārāmoti . na gahapati gahito ārāmoti . gahito na gahitoti vohārike mahāmatte pucchiṃsu . mahāmattā evamāhaṃsu yato tayā ayyaputta aggho kato gahito ārāmoti . athakho Anāthapiṇḍiko gahapati sakaṭehi hiraññaṃ nibbāhāpetvā jetavane koṭisantharaṃ santharāpesi . sakiṃ nīhaṭaṃ hiraññaṃ thokassa okāsassa koṭṭhakasāmantā nappahoti . athakho anāthapiṇḍiko gahapati manusse āṇāpesi gacchatha bhaṇe hiraññaṃ āharatha imaṃ okāsaṃ santharissāmāti . athakho jetassa rājakumārassa etadahosi na kho idaṃ orakaṃ bhavissati yathāyaṃ gahapati tāvabahuṃ hiraññaṃ pariccajatīti . athakho jeto rājakumāro anāthapiṇḍikaṃ gahapatiṃ etadavoca alaṃ gahapati mātaṃ okāsaṃ santharāpesi dehi metaṃ okāsaṃ mametaṃ dānaṃ bhavissatīti. {256.2} Athakho anāthapiṇḍiko gahapati ayaṃ kho jeto rājakumāro abhiññāto ñātamanusso mahiddhiko kho pana evarūpānaṃ ñātamanussānaṃ imasmiṃ dhammavinaye pasādoti taṃ okāsaṃ jetassa rājakumārassa adāsi . athakho jeto rājakumāro tasmiṃ okāse koṭṭhakaṃ māpesi . athakho anāthapiṇḍiko gahapati jetavane vihāre kārāpesi pariveṇāni kārāpesi koṭṭhake kārāpesi upaṭṭhānasālāyo kārāpesi aggisālāyo kārāpesi kappiyakuṭiyo kārāpesi vaccakuṭiyo kārāpesi caṅkame kārāpesi caṅkamanasālāyo kārāpesi udapāne kārāpesi udapānasālāyo kārāpesi jantāghare kārāpesi jantāgharasālāyo kārāpesi pokkharaṇiyo kārāpesi Maṇḍape kārāpesi.