[262] Athakho bhagavā bhikkhū āmantesi bhūtapubbaṃ bhikkhave himavantapasse mahānigrodho ahosi . taṃ tayo sahāyā upanissāya vihariṃsu tittiro ca makkaṭo ca hatthināgo ca . te aññamaññaṃ agāravā appatissā asabhāgavuttikā vihariṃsu . athakho bhikkhave tesaṃ sahāyānaṃ etadahosi aho nūna mayaṃ jāneyyāma yaṃ amhākaṃ jātiyā mahantataraṃ taṃ mayaṃ sakkareyyāma garukareyyāma māneyyāma pūjeyyāma tassa ca mayaṃ ovāde tiṭṭheyyāmāti . Athakho bhikkhave tittiro ca makkaṭo ca hatthināgaṃ pucchiṃsu tvaṃ samma kiṃ porāṇaṃ sarasīti . yadāhaṃ sammā potako homi imaṃ nigrodhaṃ antarā satthīnaṃ karitvā atikkamāmi aggaṅkurakaṃ me udaraṃ chupati imāhaṃ sammā porāṇaṃ sarāmīti . athakho bhikkhave tittiro ca hatthināgo ca makkaṭaṃ pucchiṃsu tvaṃ samma kiṃ porāṇaṃ sarasīti . yadāhaṃ sammā chāpo homi chamāyaṃ nisīditvā imassa nigrodhassa aggaṅkurakaṃ khādāmi imāhaṃ sammā porāṇaṃ sarāmīti . Athakho bhikkhave makkaṭo ca hatthināgo ca tittiraṃ pucchiṃsu tvaṃ samma kiṃ porāṇaṃ sarasīti . amukasmiṃ sammā okāse mahānigrodho ahosi tato ahaṃ phalaṃ bhakkhitvā imasmiṃ okāse vaccaṃ akāsiṃ tassāyaṃ nigrodho jāto tadāhaṃ sammā jātiyā mahantataroti . athakho bhikkhave makkaṭo ca hatthināgo ca tittiraṃ etadavocuṃ tvaṃ samma amhākaṃ jātiyā mahantataro taṃ mayaṃ sakkarissāma garukarissāma mānessāma pūjessāma tuyhañca mayaṃ ovāde tiṭṭheyyāmāti . athakho bhikkhave tittiro makkaṭañca hatthināgañca pañcasu sīlesu samādapesi attanā ca pañcasu sīlesu samādāya vattati . te aññamaññaṃ sagāravā sappatissā sabhāgavuttikā viharitvā kāyassa bhedā parammaraṇā sugatiṃ saggaṃ lokaṃ upapajjiṃsu. Etaṃ kho bhikkhave tittiriyaṃ nāma brahmacariyaṃ ahosīti.
[263] Ye vuḍḍhamapacāyanti narā dhammassa kovidā diṭṭhe dhamme ca pāsaṃsā samparāyo ca suggatīti. Te hi nāma bhikkhave tiracchānagatā pāṇā aññamaññaṃ sagāravā sappatissā sabhāgavuttikā viharissanti idha khvetaṃ bhikkhave sobhetha yaṃ tumhe evaṃsvākkhāte dhammavinaye pabbajitā samānā aññamaññaṃ sagāravā sappatissā sabhāgavuttikā vihareyyātha netaṃ Bhikkhave appasannānaṃ vā pasādāya .pe. vigarahitvā dhammiṃ kathaṃ katvā bhikkhū āmantesi anujānāmi bhikkhave yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ aggāsanaṃ aggodakaṃ aggapiṇḍaṃ na ca bhikkhave saṅghikaṃ yathāvuḍḍhaṃ paṭibāhitabbaṃ yo paṭibāheyya āpatti dukkaṭassāti.