[274] Tena kho pana samayena chabbaggiyā bhikkhū gilānā mayamhā avuṭṭhāpanīyāti varaseyyāyo palibuddhanti .pe. bhagavato etamatthaṃ ārocesuṃ .pe. anujānāmi bhikkhave gilānassa paṭirūpaṃ seyyaṃ dātunti.

[275] Tena kho pana samayena chabbaggiyā bhikkhū lesakappena senāsanaṃ paṭibāhanti .pe. bhagavato etamatthaṃ ārocesuṃ .pe. Na bhikkhave lesakappena senāsanaṃ paṭibāhitabbaṃ yo paṭibāheyya āpatti dukkaṭassāti.

[276] Tena kho pana samayena sattarasavaggiyā bhikkhū aññataraṃ paccantimaṃ mahāvihāraṃ paṭisaṅkharonti idha mayaṃ vassaṃ vasissāmāti . Addasaṃsu kho chabbaggiyā bhikkhū sattarasavaggiye bhikkhū vihāraṃ paṭisaṅkharonte disvāna evamāhaṃsu ime āvuso sattarasavaggiyā bhikkhū vihāraṃ paṭisaṅkharonti handa ne vuṭṭhāpessāmāti Ekacce evamāhaṃsu āgamethāvuso yāva paṭisaṅkharonti paṭisaṅkhate vuṭṭhāpessāmāti . athakho chabbaggiyā bhikkhū sattarasavaggiye bhikkhū etadavocuṃ uṭṭhethāvuso amhākaṃ vihāro pāpuṇātīti . nanu āvuso paṭikacceva ācikkhitabbaṃ mayañca aññaṃ paṭisaṅkhareyyāmāti. Nanu āvuso saṅghiko vihāroti . āmāvuso saṅghiko vihāroti . Uṭṭhethāvuso amhākaṃ vihāro pāpuṇātīti . mahallako āvuso vihāro tumhepi vasatha mayaṃpi vasissāmāti . uṭṭhethāvuso amhākaṃ vihāro pāpuṇātīti kupitā anattamanā gīvāyaṃ gahetvā nikkaḍḍhanti . Te tehi nikkaḍḍhiyamānā rodanti. {276.1} Bhikkhū evamāhaṃsu kissa tumhe āvuso rodathāti . Ime āvuso chabbaggiyā bhikkhū kupitā anattamanā amhe saṅghikā vihārā nikkaḍḍhantīti . ye te bhikkhū appicchā .pe. Te ujjhāyanti khīyanti vipācenti kathaṃ hi nāma chabbaggiyā bhikkhū kupitā anattamanā bhikkhū saṅghikā vihārā nikkaḍḍhissantīti . athakho te bhikkhū bhagavato etamatthaṃ ārocesuṃ .pe. saccaṃ kira bhikkhave chabbaggiyā bhikkhū kupitā anattamanā bhikkhū saṅghikā vihārā nikkaḍḍhantīti . saccaṃ bhagavāti .pe. vigarahitvā dhammiṃ kathaṃ katvā bhikkhū āmantesi na bhikkhave Kupitena anattamanena bhikkhū saṅghikā vihārā nikkaḍḍhitabbā yo nikkaḍḍheyya yathādhammo kāretabbo anujānāmi bhikkhave senāsanaṃ gāhetunti.