[281] Tena kho pana samayena bhikkhū senāsanaṃ gahetvā sabbakālaṃ paṭibāhanti . bhagavato etamatthaṃ ārocesuṃ .pe. Na bhikkhave senāsanaṃ gahetvā sabbakālaṃ paṭibāhitabbaṃ yo paṭibāheyya āpatti dukkaṭassa anujānāmi bhikkhave vassānaṃ Temāsaṃ paṭibāhituṃ utukālaṃ na paṭibāhitunti.

[282] Athakho bhikkhūnaṃ etadahosi katī nu kho senāsanagāhāti. Bhagavato etamatthaṃ ārocesuṃ . tayome bhikkhave senāsanagāhā purimako pacchimako antarāmuttako aparajjugatāya āsāḷhiyā purimako gāhetabbo māsagatāya āsāḷhiyā pacchimako gāhetabbo aparajjugatāya pavāraṇāya āyatiṃ vassāvāsatthāya antarāmuttako gāhetabbo ime kho bhikkhave tayo senāsanagāhāti. Dutiyabhāṇavāraṃ.