[288] Tena kho pana samayena bhikkhū asamānāsanikehi saha dīghāsane nisīdituṃ kukkuccāyanti . bhagavato etamatthaṃ ārocesuṃ . Anujānāmi bhikkhave ṭhapetvā paṇḍakaṃ mātugāmaṃ ubhatobyañjanaṃ asamānāsanikehi saha dīghāsane nisīditunti.

[289] Athakho bhikkhūnaṃ etadahosi kittakaṃ pacchimaṃ nu kho dīghāsanaṃ hotīti .pe. anujānāmi bhikkhave yaṃ tiṇṇannaṃ pahoti ettakaṃ pacchimaṃ dīghāsananti.

[290] Tena kho pana samayena visākhā migāramātā saṅghassa atthāya sālindaṃ pāsādaṃ kārāpetukāmā hoti hatthinakhakaṃ . Athakho bhikkhūnaṃ etadahosi kinnu kho bhagavatā pāsādaparibhogo anuññāto kiṃ ananuññātoti . bhagavato etamatthaṃ ārocesuṃ . Anujānāmi bhikkhave sabbaṃ pāsādaparibhoganti.

[291] Tena kho pana samayena rañño pasenadissa kosalassa ayyikā kālakatā hoti . tassā kālakiriyāya saṅghassa bahuṃ akappiyabhaṇḍaṃ uppannaṃ hoti seyyathīdaṃ āsandi pallaṅko Goṇako cittakā paṭikā paṭalikā tūlikā vikaṭikā uddhalomī ekantalomī kaṭissaṃ koseyyaṃ kuttakaṃ hatthattharaṃ assattharaṃ rathattharaṃ ajinappaveṇi kadalimigapavarapaccattharaṇaṃ sauttaracchadaṃ ubhatolohitakupadhānaṃ . Bhagavato etamatthaṃ ārocesuṃ . anujānāmi bhikkhave āsandiyā pāde chinditvā paribhuñjituṃ pallaṅkassa vāḷe bhinditvā paribhuñjituṃ tūlikaṃ vijaṭetvā bimbohanaṃ kātuṃ avasesaṃ bhummattharaṇaṃ kātunti.