[902] Adhikaraṇanti vā samathāti vā ime dhammā saṃsaṭṭhā udāhu visaṃsaṭṭhā labbhā ca imesaṃ dhammānaṃ vinibbhujitvā vinibbhujitvā nānākaraṇaṃ paññāpetuṃ . adhikaraṇanti vā samathāti vā ime dhammā saṃsaṭṭhā no visaṃsaṭṭhā labbhā ca imesaṃ dhammānaṃ vinibbhujitvā vinibbhujitvā nānākaraṇaṃ paññāpetunti . So mā hevantissa vacanīyo adhikaraṇanti vā samathāti vā ime dhammā saṃsaṭṭhā no visaṃsaṭṭhā na ca labbhā imesaṃ dhammānaṃ vinibbhujitvā vinibbhujitvā nānākaraṇaṃ paññāpetuṃ . taṃ kissa hetu . nanu vuttaṃ bhagavatā cattārīmāni bhikkhave adhikaraṇāni satta samathā adhikaraṇā samathehi sammanti samathā adhikaraṇehi sammanti evaṃ ime dhammā saṃsaṭṭhā no visaṃsaṭṭhā na ca labbhā imesaṃ dhammānaṃ vinibbhujitvā vinibbhujitvā nānākaraṇaṃ paññāpetunti. Saṃsaṭṭhavāraṃ niṭṭhitaṃ soḷasamaṃ.

[903] Vivādādhikaraṇaṃ katīhi samathehi sammati anuvādādhikaraṇaṃ katīhi samathehi sammati āpattādhikaraṇaṃ katīhi samathehi sammati kiccādhikaraṇaṃ katīhi samathehi sammati . vivādādhikaraṇaṃ dvīhi samathehi sammati sammukhāvinayena ca yebhuyyasikāya ca anuvādādhikaraṇaṃ catūhi samathehi sammati sammukhāvinayena ca sativinayena ca amūḷhavinayena ca tassapāpiyasikāya ca āpattādhikaraṇaṃ tīhi Samathehi sammati sammukhāvinayena ca paṭiññātakaraṇena ca tiṇavatthārakena ca kiccādhikaraṇaṃ ekena samathena sammati sammukhāvinayena. Vivādādhikaraṇañca anuvādādhikaraṇañca katīhi samathehi sammanti . Vivādādhikaraṇañca anuvādādhikaraṇañca pañcahi samathehi sammanti sammukhāvinayena ca yebhuyyasikāya ca sativinayena ca amūḷhavinayena ca tassapāpiyasikāya ca . vivādādhikaraṇañca āpattādhikaraṇañca katīhi samathehi sammanti . vivādādhikaraṇañca āpattādhikaraṇañca catūhi samathehi sammanti sammukhāvinayena ca yebhuyyasikāya ca paṭiññātakaraṇena ca tiṇavatthārakena ca. {903.1} Vivādādhikaraṇañca kiccādhikaraṇañca katīhi samathehi sammanti . vivādādhikaraṇañca kiccādhikaraṇañca dvīhi samathehi sammanti sammukhāvinayena ca yebhuyyasikāya ca . anuvādādhikaraṇañca āpattādhikaraṇañca katīhi samathehi sammanti . anuvādādhikaraṇañca āpattādhikaraṇañca chahi samathehi sammanti sammukhāvinayena ca sativinayena ca amūḷhavinayena ca paṭiññātakaraṇena ca tassapāpiyasikāya ca tiṇavatthārakena ca . anuvādādhikaraṇañca kiccādhikaraṇañca katīhi samathehi sammanti . anuvādādhikaraṇañca kiccādhikaraṇañca catūhi samathehi sammanti sammukhāvinayena ca sativinayena ca amūḷhavinayena ca tassapāpiyasikāya ca . āpattādhikaraṇañca kiccādhikaraṇañca katīhi samathehi sammanti . āpattādhikaraṇañca kiccādhikaraṇañca tīhi samathehi sammanti sammukhāvinayena Ca paṭiññātakaraṇena ca tiṇavatthārakena ca. {903.2} Vivādādhikaraṇañca anuvādādhikaraṇañca āpattādhikaraṇañca katīhi samathehi sammanti . vivādādhikaraṇañca anuvādādhikaraṇañca āpattādhikaraṇañca sattahi samathehi sammanti sammukhāvinayena ca yebhuyyasikāya ca sativinayena ca amūḷhavinayena ca paṭiññātakaraṇena ca tassapāpiyasikāya ca tiṇavatthārakena ca . vivādādhikaraṇañca anuvādādhikaraṇañca kiccādhikaraṇañca katīhi samathehi sammanti. {903.3} Vivādādhikaraṇañca anuvādādhikaraṇañca kiccādhikaraṇañca pañcahi samathehi sammanti sammukhāvinayena ca yebhuyyasikāya ca sativinayena ca amūḷhavinayena ca tassapāpiyasikāya ca . [1]- vivādādhikaraṇañca anuvādādhikaraṇañca āpattādhikaraṇañca kiccādhikaraṇañca katīhi samathehi sammanti . vivādādhikaraṇañca anuvādādhikaraṇañca āpattādhikaraṇañca kiccādhikaraṇañca sattahi samathehi sammanti sammukhāvinayena ca yebhuyyasikāya ca sativinayena ca amūḷhavinayena ca paṭiññātakaraṇena ca tassapāpiyasikāya ca tiṇavatthārakena ca. Sammantivāraṃ niṭṭhitaṃ sattarasamaṃ.