[93] Taduttariṃ āvasathapiṇḍaṃ bhuñjantassa pācittiyaṃ kattha paññattanti . sāvatthiyā paññattaṃ . kaṃ ārabbhāti . chabbaggiye Bhikkhū ārabbha . kismiṃ vatthusminti . chabbaggiyā bhikkhū anuvasitvā anuvasitvā āvasathapiṇḍaṃ bhuñjiṃsu tasmiṃ vatthusmiṃ . ekā paññatti ekā anuppaññatti . channaṃ āpattisamuṭṭhānānaṃ dvīhi samuṭṭhānehi samuṭṭhāti (eḷakalomake) .pe.

[94] Gaṇabhojane pācittiyaṃ kattha paññattanti . rājagahe paññattaṃ . kaṃ ārabbhāti . devadattaṃ ārabbha . kismiṃ vatthusminti . devadatto sapariso kulesu viññāpetvā viññāpetvā bhuñji tasmiṃ vatthusmiṃ . ekā paññatti satta anuppaññattiyo . channaṃ āpattisamuṭṭhānānaṃ dvīhi samuṭṭhānehi samuṭṭhāti (eḷakalomake) .pe.

[95] Paramparabhojane pācittiyaṃ kattha paññattanti . vesāliyā paññattaṃ . kaṃ ārabbhāti . sambahule bhikkhū ārabbha . Kismiṃ vatthusminti . sambahulā bhikkhū aññatra nimantitā aññatra bhuñjiṃsu tasmiṃ vatthusmiṃ . ekā paññatti tisso anuppaññattiyo . channaṃ āpattisamuṭṭhānānaṃ dvīhi samuṭṭhānehi samuṭṭhāti (kaṭhinake) .pe.

[96] Dvittipattapūre pūve paṭiggahetvā taduttariṃ paṭiggaṇhantassa pācittiyaṃ kattha paññattanti . sāvatthiyā paññattaṃ . Kaṃ ārabbhāti . sambahule bhikkhū ārabbha . kismiṃ vatthusminti . Sambahulā bhikkhū na mattaṃ jānitvā paṭiggahesuṃ tasmiṃ vatthusmiṃ . Ekā paññatti . channaṃ āpattisamuṭṭhānānaṃ chahi samuṭṭhānehi samuṭṭhāti .pe.