[217] Anādariyaṃ paṭicca surusurukārakaṃ bhuñjantassa dukkaṭaṃ kattha paññattanti . kosambiyā paññattaṃ . kaṃ ārabbhāti . sambahule bhikkhū ārabbha . kasmiṃ vatthusminti . sambahulā bhikkhū surusurukārakaṃ khīraṃ piviṃsu tasmiṃ vatthusmiṃ . ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti (paṭhamapārājike).

[218] Anādariyaṃ paṭicca hatthanillehakaṃ bhuñjantassa dukkaṭaṃ .pe. ekā paññatti .pe. ekena samuṭṭhānena samuṭṭhāti (paṭhamapārājike).

[219] Anādariyaṃ paṭicca pattanillehakaṃ bhuñjantassa dukkaṭaṃ .pe. ekā paññatti .pe. ekena samuṭṭhānena samuṭṭhāti (paṭhamapārājike)

[220] Anādariyaṃ paṭicca oṭṭhanillehakaṃ bhuñjantassa dukkaṭaṃ .pe. ekā paññatti .pe. ekena samuṭṭhānena samuṭṭhāti (paṭhamapārājike).