[261] Atirekacīvaraṃ dasāhaṃ atikkāmento ekaṃ āpattiṃ āpajjati nissaggiyaṃ pācittiyaṃ.

[262] Ekarattiṃ ticīvarena vippavasanto ekaṃ āpattiṃ āpajjati nissaggiyaṃ pācittiyaṃ.

[263] Akālacīvaraṃ paṭiggahetvā māsaṃ atikkāmento ekaṃ āpattiṃ āpajjati nissaggiyaṃ pācittiyaṃ.

[264] Aññātikāya bhikkhuniyā purāṇacīvaraṃ dhovāpento dve āpattiyo āpajjati dhovāpeti payoge dukkaṭaṃ dhovāpite nissaggiyaṃ pācittiyaṃ.