[653] Usūyavādikā bhikkhunī aṭṭaṃ karontī tisso āpattiyo āpajjati ekassa āroceti āpatti dukkaṭassa dutiyassa āroceti āpatti thullaccayassa aṭṭapariyosāne āpatti saṅghādisesassa.

[654] Coriṃ vuṭṭhāpentī tisso āpattiyo āpajjati ñattiyā dukkaṭaṃ dvīhi kammavācāhi thullaccayā kammavācāpariyosāne āpatti saṅghādisesassa.

[655] Ekā gāmantaraṃ gacchantī tisso āpattiyo āpajjati gacchati āpatti dukkaṭassa paṭhamaṃ pādaṃ parikkhepaṃ atikkāmeti āpatti thullaccayassa dutiyaṃ pādaṃ atikkāmeti āpatti Saṅghādisesassa.

[656] Samaggena saṅghena ukkhittaṃ bhikkhuniṃ dhammena vinayena satthusāsanena anapaloketvā kārakasaṅghaṃ anaññāya gaṇassa chandaṃ osārentī tisso āpattiyo āpajjati ñattiyā dukkaṭaṃ dvīhi kammavācāhi thullaccayā kammavācāpariyosāne āpatti saṅghādisesassa.