[884] Vivādādhikaraṇassa kiṃ pubbaṅgamaṃ kati ṭhānāni kati vatthūni kati bhūmiyo kati hetū kati mūlāni katīhākārehi vivadati vivādādhikaraṇaṃ katīhi samathehi sammati . anuvādādhikaraṇassa kiṃ pubbaṅgamaṃ kati ṭhānāni kati vatthūni kati bhūmiyo kati hetū kati mūlāni katīhākārehi anuvadati anuvādādhikaraṇaṃ katīhi samathehi sammati . āpattādhikaraṇassa kiṃ pubbaṅgamaṃ kati ṭhānāni kati vatthūni kati bhūmiyo kati hetū kati mūlāni katīhākārehi āpattiṃ āpajjati āpattādhikaraṇaṃ katīhi samathehi sammati . kiccādhikaraṇassa kiṃ pubbaṅgamaṃ kati ṭhānāni kati vatthūni kati bhūmiyo kati hetū kati mūlāni katīhākārehi kiccaṃ jāyati kiccādhikaraṇaṃ katīhi samathehi sammati.

[885] Vivādādhikaraṇassa kiṃ pubbaṅgamanti . lobho pubbaṅgamo doso pubbaṅgamo moho pubbaṅgamo alobho pubbaṅgamo adoso pubbaṅgamo amoho pubbaṅgamo . kati ṭhānānīti . Aṭṭhārasa bhedakaravatthūni ṭhānāni . kati vatthūnīti . aṭṭhārasa bhedakaravatthūni . kati bhūmiyoti . aṭṭhārasa bhedakaravatthūni bhūmiyo . Kati hetūti . nava hetū tayo kusalahetū tayo akusalahetū tayo abyākatahetū . kati mūlānīti . dvādasa mūlāni . Katīhākārehi vivadatīti . dvīhākārehi vivadati dhammadiṭṭhi vā adhammadiṭṭhi vā . vivādādhikaraṇaṃ katīhi samathehi sammatīti . Vivādādhikaraṇaṃ dvīhi samathehi sammati sammukhāvinayena ca yebhuyyasikāya ca.

[886] Anuvādādhikaraṇassa kiṃ pubbaṅgamanti . lobho pubbaṅgamo doso pubbaṅgamo moho pubbaṅgamo alobho pubbaṅgamo adoso pubbaṅgamo amoho pubbaṅgamo . kati ṭhānānīti . Catasso vipattiyo ṭhānāni . kati vatthūnīti . catasso vipattiyo vatthūni . kati bhūmiyoti . catasso vipattiyo bhūmiyo . kati hetūti . nava hetū tayo kusalahetū tayo akusalahetū tayo abyākatahetū . kati mūlānīti . cuddasa mūlāni . katīhākārehi anuvadatīti . dvīhākārehi anuvadati vatthuto vā āpattito vā . Anuvādādhikaraṇaṃ katīhi samathehi sammatīti . anuvādādhikaraṇaṃ catūhi samathehi sammati sammukhāvinayena ca sativinayena ca amūḷhavinayena ca tassapāpiyasikāya ca.