[367] Bhikkhussa sañcicca kukkuccaṃ upadahanto dve āpattiyo āpajjati upadahati payoge dukkaṭaṃ upadahite āpatti pācittiyassa.

[368] Bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭhanto dve āpattiyo āpajjati sossāmīti gacchati āpatti dukkaṭassa yattha ṭhito suṇāti āpatti pācittiyassa.

[369] Dhammikānaṃ kammānaṃ chandaṃ datvā pacchā khīyanadhammaṃ āpajjanto dve āpattiyo āpajjati khīyati payoge dukkaṭaṃ khīyite āpatti pācittiyassa.

[370] Saṅghe vinicchayakathāya vattamānāya channaṃ adatvā uṭṭhāyāsanā pakkamanto dve āpattiyo āpajjati parisāya hatthapāsaṃ avijahantassa āpatti dukkaṭassa vijahite āpatti pācittiyassa.