[550] Uccāraṃ vā passāvaṃ vā kheḷaṃ vā saṅkāraṃ vā vighāsaṃ vā harite chaḍḍentiyā pācittiyaṃ kattha paññattanti . sāvatthiyā paññattaṃ . kaṃ ārabbhāti . sambahulā bhikkhuniyo ārabbha . Kismiṃ vatthusminti . sambahulā bhikkhuniyo uccārampi passāvampi kheḷampi saṅkārampi vighāsampi harite chaḍḍesuṃ tasmiṃ vatthusmiṃ . Ekā paññatti . channaṃ āpattisamuṭṭhānānaṃ chahi samuṭṭhānehi samuṭṭhāti.

[551] Naccaṃ vā gītaṃ vā vāditaṃ vā dassanāya gacchantiyā Pācittiyaṃ kattha paññattanti . rājagahe paññattaṃ . kaṃ ārabbhāti . chabbaggiyā bhikkhuniyo ārabbha . kismiṃ vatthusminti . Chabbaggiyā bhikkhuniyo naccampi gītampi vāditampi dassanāya agamaṃsu tasmiṃ vatthusmiṃ . ekā paññatti . channaṃ āpattisamuṭṭhānānaṃ dvīhi samuṭṭhānehi samuṭṭhāti (eḷakalomake). Lasuṇavaggo paṭhamo .