[691] Vikāle kulāni upasaṅkamitvā sāmike anāpucchā seyyaṃ santharitvā vā santharāpetvā vā abhinisīdantī dve āpattiyo āpajjati abhinisīdati payoge dukkaṭaṃ abhinisinne āpatti pācittiyassa.

[692] Duggahitena dūpadhāritena paraṃ ujjhāpentī dve āpattiyo āpajjati ujjhāpeti payoge dukkaṭaṃ ujjhāpite āpatti pācittiyassa.

[693] Attānaṃ vā paraṃ vā nirayena vā brahmacariyena vā abhisapantī dve āpattiyo āpajjati abhisapati payoge dukkaṭaṃ abhisapite āpatti pācittiyassa.

[694] Attānaṃ vadhitvā vadhitvā rodantī dve āpattiyo āpajjati vadhati rodati āpatti pācittiyassa vadhati na rodati āpatti dukkaṭassa. Rattandhakāravaggo dutiyo.