[832] Eḷakalomā dve seyyā āhaccapiṇḍabhojanaṃ gaṇavikāle sannidhi dantapoṇenacelakā uyyuttaṃ vase uyyodhi surā orena nhāyanā dubbaṇṇe dve desanikā lasuṇuttiṭṭhe naccanā. Nhānaṃ attharaṇaṃ seyyā antoraṭṭhe tathā bahi Antovassaṃ cittāgāraṃ āsandi suttakantanā veyyāvaccaṃ sahatthā ca abhikkhukāvāsena ca chattaṃ yānañca saṅghāṇiṃ alaṅkāraṃ gandhavāsitaṃ bhikkhunī sikkhamānā ca sāmaṇerī gihiniyā asaṅkacchikā āpattī cattārīsā ca catuttari kāyena na vācācittena kāyacittena na vācato dvisamuṭṭhānikā sabbe samā eḷakalomakā. Eḷakalomasamuṭṭhānaṃ niṭṭhitaṃ.

[833] Padaññatra asammatā tathā atthaṅgatena ca tiracchānavijjā dve vuttā anokāse ca pucchanā satta sikkhāpadā ete vācā na kāyacittato vācācittena jāyanti na tu kāyena jāyare dvisamuṭṭhānikā sabbe padasodhammasādisā. Padasodhammasamuṭṭhānaṃ niṭṭhitaṃ.

[834] Addhānanāvaṃ paṇītaṃ mātugāmena saṅghare dhaññaṃ nimantitā ceva aṭṭha ca pāṭidesanī sikkhā paṇṇarasā ete kāyā na vācā na manā kāyavācāya jāyanti na te cittena jāyare kāyacittena jāyanti na te jāyanti vācato kāyavācāya cittena samuṭṭhānā catubbidhā Paññattā buddhañāṇena addhānena samā nayā . Addhānasamuṭṭhānaṃ niṭṭhitaṃ.

[835] Theyyasatthaṃ upassuti sūpaviññāpanena ca ratti channañca okāsaṃ ete byūhena sattamā kāyacittena jāyanti na te jāyanti vācato tīhi dvārehi jāyanti dvisamuṭṭhānikā ime theyyasatthasamuṭṭhānā desitādiccabandhunā. Theyyasatthasamuṭṭhānaṃ niṭṭhitaṃ.