[845] Tattha katamāni pañca vinītavatthūni. Pañcahi āpattikkhandhehi ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto. Imāni pañca vinītavatthūni.

[846] Tattha katamā satta āpattiyo . pārājikāpatti saṅghādisesāpatti thullaccayāpatti pācittiyāpatti pāṭidesanīyāpatti dukkaṭāpatti dubbhāsitāpatti. Imā satta āpattiyo.

[847] Tattha katame satta āpattikkhandhā. Pārājikāpattikkhandho saṅghādisesāpattikkhandho thullaccayāpattikkhandho pācittiyāpattikkhandho pāṭidesanīyāpattikkhandho dukkaṭāpattikkhandho dubbhāsitāpattikkhandho . Ime satta āpattikkhandhā.

[848] Tattha katamāni satta vinītavatthūni. Sattahi āpattikkhandhehi ārati virati paṭivirati veramaṇī akiriyā akaraṇaṃ anajjhāpatti velāanatikkamo setughāto. Imāni satta vinītavatthūni.