[887] Āpattādhikaraṇassa kiṃ pubbaṅgamanti . lobho pubbaṅgamo doso pubbaṅgamo moho pubbaṅgamo alobho pubbaṅgamo adoso pubbaṅgamo amoho pubbaṅgamo . kati ṭhānānīti . satta āpattikkhandhā ṭhānāni . kati vatthūnīti . satta āpattikkhandhā vatthūni . kati bhūmiyoti . satta āpattikkhandhā bhūmiyo . kati hetūti . nava hetū tayo kusalahetū tayo akusalahetū tayo abyākatahetū . kati mūlānīti . cha āpattisamuṭṭhānāni Mūlāni . katīhākārehi āpattiṃ āpajjatīti . chahākārehi āpattiṃ āpajjati alajjitā aññāṇatā kukkuccapakatatā akappiye kappiyasaññitā kappiye akapiyasaññitā satisammosā . Āpattādhikaraṇaṃ katīhi samathehi sammatīti . āpattādhikaraṇaṃ tīhi samathehi sammati sammukhāvinayena ca paṭiññātakaraṇena ca [2]- tiṇavatthārakena ca.

[888] Kiccādhikaraṇassa kiṃ pubbaṅgamanti . lobho pubbaṅgamo doso pubbaṅgamo moho pubbaṅgamo alobho pubbaṅgamo adoso pubbaṅgamo amoho pubbaṅgamo . kati ṭhānānīti . Cattāri kammāni ṭhānāni . kati vatthūnīti . cattāri kammāni vatthūni . kati bhūmiyoti . cattāri kammāni bhūmiyo . kati hetūti. Nava hetū tayo kusalahetū tayo akusalahetū tayo abyākatahetū . Kati mūlānīti . ekaṃ mūlaṃ saṅgho . katīhākārehi kiccaṃ jāyatīti. Dvīhākārehi kiccaṃ jāyati ñattito vā apalokanato vā . Kiccādhikaraṇaṃ katīhi samathehi sammatīti . kiccādhikaraṇaṃ ekena samathena sammati sammukhāvinayena.

[889] Kati samathāti . satta samathā sammukhāvinayo sativinayo amūḷhavinayo paṭiññātakaraṇaṃ yebhuyyasikā tassapāpiyasikā tiṇavatthārako ime satta samathā . siyā ime satta samathā dasa samathā honti dasa samathā satta samathā honti vatthuvasena pariyāyena . siyāti . kathañca siyā . vivādādhikaraṇassa dve Samathā anuvādādhikaraṇassa cattāro samathā āpattādhikaraṇassa tayo samathā kiccādhikaraṇassa eko samatho . evaṃ ime satta samathā dasa samathā honti dasa samathā satta samathā honti vatthuvasena pariyāyena. Pariyāyavāraṃ niṭṭhitaṃ chaṭṭhaṃ.