[916] Vivādādhikaraṇaṃ sattannaṃ samathānaṃ kati samathe bhajati kati samathe upanissitaṃ kati samathe pariyāpannaṃ katīhi samathehi saṅgahitaṃ katīhi samathehi sammati . anuvādādhikaraṇaṃ .pe. āpattādhikaraṇaṃ .pe. Kiccādhikaraṇaṃ sattannaṃ samathānaṃ kati samathe bhajati kati samathe upanissitaṃ kati samathe pariyāpannaṃ katīhi samathehi saṅgahitaṃ katīhi samathehi sammati . vivādādhikaraṇaṃ sattannaṃ samathānaṃ dve samathe bhajati dve samathe upanissitaṃ dve samathe pariyāpannaṃ dvīhi samathehi saṅgahitaṃ dvīhi samathehi sammati sammukhāvinayena ca yebhuyyasikāya ca . anuvādādhikaraṇaṃ sattannaṃ samathānaṃ cattāro samathe bhajati cattāro samathe upanissitaṃ cattāro samathe pariyāpannaṃ catūhi samathehi saṅgahitaṃ catūhi samathehi sammati sammukhāvinayena ca Sativinayena ca amūḷhavinayena ca tassapāpiyasikāya ca . āpattādhikaraṇaṃ sattannaṃ samathānaṃ tayo samathe bhajati tayo samathe upanissitaṃ tayo samathe pariyāpannaṃ tīhi samathehi saṅgahitaṃ tīhi samathehi sammati sammukhāvinayena ca paṭiññātakaraṇena ca tiṇavatthārakena ca . kiccādhikaraṇaṃ sattannaṃ samathānaṃ ekaṃ samathaṃ bhajati ekaṃ samathaṃ upanissitaṃ ekaṃ samathaṃ pariyāpannaṃ ekena samathena saṅgahitaṃ ekena samathena sammati sammukhāvinayenāti. Samathabhedaṃ niṭṭhitaṃ . Tassuddānaṃ

[917] Adhikaraṇaṃ pariyāpannaṃ sādhāraṇā ca bhāgiyā samathā sādhāraṇikā samathassa tabbhāgiyā samathā sammukhā ceva vinaye kusalena ca yatthasamayasaṃsaṭṭhā sammanti na sammanti ca samathādhikaraṇañceva samuṭṭhānaṃ bhajanti cāti. ------------