[948] Dve kaṭhinassa palibodhā āvāsapalibodho ca cīvarapalibodho ca . dve kaṭhinassa apalibodhā āvāsāpalibodho ca cīvarāpalibodho ca . dve cīvarāni gahapatikañca paṃsukūlikañca . Dve pattā ayopatto ca mattikāpatto ca . Dve maṇḍalāni tipumayañca sisamayañca . dve pattassa adhiṭṭhānā kāyena vā adhiṭṭheti vācāya vā adhiṭṭheti . dve cīvarassa adhiṭṭhānā kāyena vā adhiṭṭheti vācāya vā adhiṭṭheti . dve vikappanā sammukhāvikappanā ca parammukhāvikappanā ca . dve vinayā bhikkhūnañca bhikkhunīnañca . dve venayikā paññattañca paññattānulomañca . dve vinayassa sallekhā akappiye setughāto kappiye mattakāritā.
[949] Dvīhākārehi āpattiṃ āpajjati kāyena vā āpajjati vācāya vā āpajjati . dvīhākārehi āpattiyā vuṭṭhāti kāyena vā vuṭṭhāti vācāya vā vuṭṭhāti. Dve parivāsā paṭicchannaparivāso ca appaṭicchannaparivāso ca . Aparepi dve parivāsā suddhantaparivāso ca samodhānaparivāso ca . dve mānantā paṭicchannamānattañca appaṭicchannamānattañca . aparepi dve mānattā pakkhamānattañca samodhānamānattañca . dvinnaṃ puggalānaṃ Ratticchedo pārivāsikassa ca mānattacārikassa ca.
[950] Dve anādariyāni puggalānādariyañca dhammānādariyañca . Dve loṇāni jātimayañca khārimayañca . aparānipi dve loṇāni sāmuddañca kāḷaloṇañca . aparānipi dve loṇāni sindhavañca ubbhidañca . aparānipi dve loṇāni romakañca pakkhallakañca . dve paribhogā abbhantaraparibhogo ca bāhiraparibhogo ca . dve akkosā hīno ca akkoso ukkaṭṭho ca akkoso . dvīhākārehi pesuññaṃ hoti piyakamyassa vā bhedādhippāyassa vā . dvīhākārehi gaṇabhojanaṃ pasavati nimantanato vā viññattito vā . dve vassupanāyikā purimikā ca pacchimikā ca . dve adhammikāni pātimokkhaṭṭhapanāni dve dhammikāni pātimokkhaṭṭhapanāni.
[951] Dve puggalā bālā yo ca anāgataṃ bhāraṃ vahati yo ca āgataṃ bhāraṃ na vahati . dve puggalā paṇḍitā yo ca anāgataṃ bhāraṃ na vahati yo ca āgataṃ bhāraṃ vahati . aparepi dve puggalā bālā no ca akappiye kappiyasaññī yo ca kappiye akappiyasaññī . dve puggalā paṇḍitā yo ca akappiye akappiyasaññī yo ca kappiye kappiyasaññī . aparepi dve puggalā bālā yo ca anāpattiyā āpattisaññī yo ca āpattiyā anāpattisaññī . dve puggalā paṇḍitā Yo ca āpattiyā āpattisaññī yo ca anāpattiyā anāpattisaññī . Aparepi dve puggalā bālā yo ca adhamme dhammasaññī yo ca dhamme adhammasaññī . dve puggalā paṇḍitā yo ca adhamme adhammasaññī yo ca dhamme dhammasaññī . aparepi dve puggalā bālā yo ca avinaye vinayasaññī yo ca vinaye avinayasaññī . dve puggalā paṇḍitā yo ca avinaye avinayasaññī yo ca vinaye vinayasaññī.