[952] Dvinnaṃ puggalānaṃ āsavā vaḍḍhanti yo ca na kukkuccāyitabbaṃ kukkuccāyati yo ca kukkuccāyitabbaṃ na kukkuccāyati . Dvinnaṃ puggalānaṃ āsavā na vaḍḍhanti yo ca na kukkuccāyitabbaṃ na kukkuccāyati yo ca kukkuccāyitabbaṃ kukkuccāyati . aparesampi dvinnaṃ puggalānaṃ āsavā vaḍḍhanti yo ca akappiye kappiyasaññī yo ca kappiye akappiyasaññī . dvinnaṃ puggalānaṃ āsavā na vaḍḍhanti yo ca akappiye akappiyasaññī yo ca kappiye kappiyasaññī . aparesampi dvinnaṃ puggalānaṃ āsavā vaḍḍhanti yo ca anāpattiyā āpattisaññī yo ca āpattiyā anāpattisaññī . Dvinnaṃ puggalānaṃ āsavā na vaḍḍhanti yo ca anāpattiyā anāpattisaññī yo ca āpattiyā āpattisaññī . aparesampi dvinnaṃ puggalānaṃ āsavā vaḍḍhanti yo ca adhamme dhammasaññī yo ca dhamme adhammasaññī . dvinnaṃ puggalānaṃ āsavā na Vaḍḍhanti yo ca adhamme adhammasaññī yo ca dhamme dhammasaññī . Aparesampi dvinnaṃ puggalānaṃ āsavā vaḍḍhanti yo ca avinaye vinayasaññī yo ca vinaye avinayasaññī . dvinnaṃ puggalānaṃ āsavā na vaḍḍhanti yo ca avinaye avinayasaññī yo ca vinaye vinayasaññī. Dukaṃ niṭṭhitaṃ . Tassuddānaṃ

[953] Saññā laddhā ca saddhammā parikkhārā ca puggalā saccaṃ bhūmi nikkhamanto ādiyanto samādiyaṃ karonto dento gaṇhanto paribhogena ratti ca aruṇā chindaṃ chādento dhārento ca uposathā pavāraṇā kammāparā vatthu aparā dosā ca aparā dve ca sampatti nānā samānameva ca pārāji saṅghā thullaccaṃ pācitti pāṭidesanī dukkaṭā bhāsitañceva satta āpattikhandhakā bhijjati upasampadā tatheva apare duve na vatthabbaṃ na dātabbaṃ abhabbābhabbameva ca sañcicca sātisārā ca paṭikkosā nisāraṇā Osāraṇā paṭiññā ca paṭiggahā paṭikkhipā upaghāti codanā ca kaṭhinā ca duve tathā cīvarā pattamaṇḍalā adhiṭṭhānā tathā duve vikappanā ca vinayā venayikā salekkhakā āpajjati ca vuṭṭhāti parivāsāpare duve dve mānattā apare ca ratticchedo anādari dve loṇā tayo apare paribhogā akkosanā pesuññaṃ ca gaṇā vassaṃ ṭhapanā bhārakappiyā anāpatti adhamme ca vinaye āsave tathāti.