[1016] Ekaṃsaṃ cīvaraṃ katvā paggaṇhitvāna añjaliṃ āsiṃsamānarūpo va kissa tvaṃ idhamāgato. Dvīsu vinayesu [1]- paññattā uddesaṃ āgacchanti uposathesu kati te sikkhāpadā honti katīsu nagaresu paññattā. Bhaddako te ummaṅgo yoniso paripucchasi taggha te ahamakkhissaṃ yathāpi kusalo tathā. Dvīsu vinayesu [1]- paññattā uddesaṃ āgacchanti uposathesu aḍḍhuḍḍhasatāni te honti sattasu nagaresu paññattā.

[1017] Katamesu sattasu nagaresu paññattā. Iṅgha me tvaṃ byākara naṃ . Tava vacanapathaṃ nisāmayitvā paṭipajjema hitāya no siyā . Vesāliyā rājagahe sāvatthiyā ca āḷaviyā kosambiyā ca sakkesu bhaggesu ceva paññattā.

[1018] Kati vesāliyā paññattā kati rājagahe katā sāvatthiyā kati honti kati āḷaviyā katā kati kosambiyā paññattā kati sakkesu vuccanti kati bhaggesu paññattā taṃ me akkhāhi pucchito. Dasavesāliyā paññattā ekavīsā rājagahe katā chaūnatīṇi satāni sabbe sāvatthiyā katā cha āḷaviyā paññattā aṭṭha kosambiyā katā aṭṭha sakkesu vuccanti tayo bhaggesu paññattā. Ye vesāliyā paññattā te suṇohi yathākathaṃ . Methunaṃ viggahuttari atirekañca kāḷakaṃ bhūtaṃ paramparābhattaṃ dantapoṇena acelako bhikkhunīsu ca akkoso dasete vesāliyā katā. Ye rājagahe paññattā te suṇohi yathākathaṃ . Adinnādānaṃ rājagahe dve ca anuddhaṃsanā dvepi ca bhedā antaravāsakaṃ rūpiyaṃ suttaṃ ujjhāpanakena ca Pācitapiṇḍaṃ gaṇabhojanaṃ vikāle cārittaṃ nhānaṃ ūnavīsa cīvaraṃ datvā vosāsantī ete rājagahe katā. Giraggacariyā tattheva chandadānena ekavīsati. Ye sāvatthiyā paññattā te suṇohi yathākathaṃ. Pārājikāni cattāri saṅghādisesā bhavanti soḷasa aniyatā [2]- dve honti nissaggiyā catuvīsati chappaññāsasatañceva khuddakāni pavuccare dasa gārayhā dvesattati sekhiyā. Chaūnatīṇi satāni sabbe sāvatthiyā katā. Ye āḷaviyā paññattā te suṇohi yathākathaṃ. Kuṭikosiyaseyyā ca khaṇane gaccha devate sappāṇakañca siñcanti cha ete āḷaviyā katā. Ye kosambiyā paññattā te suṇohi yathākathaṃ. Mahāvihāro dovacassaṃ aññaṃ dvāraṃ surāya ca anādariyaṃ sahadhammo ca payopānena aṭṭhamaṃ. Ye sakkesu paññattā te suṇohi yathākathaṃ. Eḷakalomāni patto ca ovādopi ca bhesajjaṃ sūci āraññako ceva cha ete kāpilavatthave. Udake suddhiyā ovādo bhikkhunīsu pavuccati . Ye bhaggesu paññattā te suṇohi yathākathaṃ. Samādahitvā visibbenti sāmisena sasitthakaṃ. Pārājikāni cattāri saṅghādisesāni bhavanti satta nissaggiyāni aṭṭha dvattiṃsati ca khuddakā dvegārayhā tayo sekhā chappaññāsa [3]- chasu nagaresu paññattā buddhenādiccabandhunā chaūnatīṇi satāni sabbe sāvatthiyā katā [4]- Gotamena yasassinā.