[1019] Yantvaṃ apucchimhā akittayī no tantaṃ byākataṃ anaññathā. Aññantaṃ pucchāma tadiṅgha brūhi. Garukaṃ lahukaṃ cāpi sāvasesaṃ anavasesaṃ duṭṭhullañca aduṭṭhullaṃ ye ca yāvatatiyakā sādhāraṇaṃ asādhāraṇaṃ vipattiyo ca yehi samathehi sammanti sabbāni petāni viyākarohi. Handa vākyaṃ suṇoma te. Ekatiṃsā ye garukā aṭṭhettha anavasesā Ye garukā te duṭṭhullā ye duṭṭhullā sā sīlavipatti. Pārājikaṃ saṅghādiseso sīlavipattīti vuccati. Thullaccayaṃ pācittiyaṃ pāṭidesanīyaṃ dukkaṭaṃ dubbhāsitaṃ yocāyaṃ akkosati hassādhippāyo. Ayaṃ sā ācāravipattisammatā.

[1020] Viparītadiṭṭhiṃ gaṇhanti asaddhammehi purakkhatā abbhācikkhanti sambuddhaṃ duppaññā mohapārutā ayaṃ sā diṭṭhivipattisammatā.

[1021] Ājīvahetu ājīvakāraṇā pāpiccho icchāpakato asantaṃ abhūtaṃ uttarimanussadhammaṃ ullapati ājīvahetu ājīvakāraṇā sañcarittaṃ samāpajjati ājīvahetu ājīvakāraṇā yo te vihāre vasati so bhikkhu arahāti bhaṇati ājīvahetu ājīvakāraṇā bhikkhu paṇītabhojanāni attano atthāya viññāpetvā bhuñjati ājīvahetu ājīvakāraṇā bhikkhunī paṇītabhojanāni attano atthāya viññāpetvā bhuñjati ājīvahetu ājīvakāraṇā bhikkhu sūpaṃ vā odanaṃ vā agilāno attano atthāya viññāpetvā bhuñjati. Ayaṃ sā ājīvavipattisammatā.

[1022] Ekādasa yāvatatiyakā te suṇohi yathākathaṃ. Ukkhittānuvattikā aṭṭha yāvatatiyakā ariṭṭho caṇḍakālī ca ime te yāvatatiyakā.