[1039] Nissaggiyanti yaṃ vuttaṃ taṃ suṇohi yathākathaṃ. Saṅghamajjhe gaṇamajjhe ekakasseva ekato nissajjitvā yaṃ deseti tenetaṃ iti vuccati.

[1040] Pācittiyanti yaṃ vuttaṃ taṃ suṇohi yathākathaṃ. Pāteti kusalaṃ dhammaṃ ariyamaggaṃ aparajjhati cittasammohanaṭṭhānaṃ tenetaṃ iti vuccati.

[1041] Pāṭidesanīyanti yaṃ vuttaṃ taṃ suṇohi yathākathaṃ. Bhikkhu aññātako santo kicchā laddhāya bhojanaṃ sāmaṃ gahetvā bhuñjeyya gārayhanti pavuccati. Nimantanāsu bhuñjanto chandāya vosāsati tattha bhikkhunī anivāretvā tahiṃ bhuñje gārayhanti pavuccati. Saddhācittaṃ kulaṃ gantvā appabhogaṃ anāḷhiyaṃ agilāno tahiṃ bhuñje gārayhanti pavuccati. Yo ce araññe viharanto sāsaṅke sabhayānake aviditaṃ tahiṃ bhuñje gārayhanti pavuccati. Bhikkhunī aññātikā santā yaṃ paresaṃ mamāyitaṃ sappi telaṃ madhu phāṇitaṃ macchamaṃsaṃ athopi khīraṃ dadhiṃ Sayaṃ viññāpeyya bhikkhunī gārayhapattā sugatassa sāsane.

[1042] Dukkaṭanti yaṃ vuttaṃ taṃ suṇohi yathākathaṃ. Aparaddhaṃ viraddhañca khalitaṃ yañca dukkaṭaṃ yaṃ manusso kare pāpaṃ āvi vā yadi vā raho dukkaṭanti pavedenti tenetaṃ iti vuccati.