[1087] Saṅgāmāvacarena bhikkhunā saṅghe voharantena vatthuṃ jānitabbaṃ vipatti jānitabbā āpatti jānitabbā nidānaṃ jānitabbaṃ ākāro jānitabbo pubbāparaṃ jānitabbaṃ katākataṃ jānitabbaṃ kammaṃ jānitabbaṃ adhikaraṇaṃ jānitabbaṃ samatho jānitabbo na chandāgati gantabbā na dosāgati gantabbā na mohāgati gantabbā na bhayāgati gantabbā saññāpanīye ṭhāne saññāpetabbaṃ nijjhāpanīye ṭhāne nijjhāpetabbaṃ pekkhanīye ṭhāne pekkhitabbaṃ pasādanīye ṭhāne pasādetabbaṃ laddhapakkhomhīti paro pakkho nāvajānitabbo bahussutomhīti appassuto nāvajānitabbo therataromhīti navakataro nāvajānitabbo asampattaṃ na byāharitabbaṃ sampattaṃ dhammato vinayato na parihāpetabbaṃ yena dhammena yena vinayena yena satthusāsanena taṃ adhikaraṇaṃ vūpasammati tathā taṃ adhikaraṇaṃ vūpasametabbaṃ.

[1088] Vatthuṃ jānitabbanti aṭṭhapārājikānaṃ vatthuṃ jānitabbaṃ tevīsasaṅghādisesānaṃ vatthuṃ jānitabbaṃ dveaniyatānaṃ vatthuṃ jānitabbaṃ dvecattāḷīsanissaggiyānaṃ vatthuṃ jānitabbaṃ aṭṭhāsītisatapācittiyānaṃ vatthuṃ jānitabbaṃ dvādasapāṭidesanīyānaṃ vatthuṃ jānitabbaṃ dukkaṭānaṃ Vatthuṃ jānitabbaṃ dubbhāsitānaṃ vatthuṃ jānitabbaṃ.

[1089] Vipatti jānitabbāti sīlavipatti jānitabbā ācāravipatti jānitabbā diṭṭhivipatti jānitabbā ājīvavipatti jānitabbā.

[1090] Āpatti jānitabbāti pārājikāpatti jānitabbā saṅghādisesāpatti jānitabbā thullaccayāpatti jānitabbā pācittiyāpatti jānitabbā pāṭidesanīyāpatti jānitabbā dukkaṭāpatti jānitabbā dubbhāsitāpatti jānitabbā.