[1112] Kathaṃ laddhapakkhomhīti paraṃ pakkhaṃ avajānāti . Idhekacco laddhapakkho hoti laddhaparivāro pakkhavā ñātivā ayaṃ aladdhapakkho aladdhaparivāro na pakkhavā na ñātivāti tassa avajānanto adhammaṃ dhammoti dīpeti dhammaṃ adhammoti dīpeti .pe. duṭṭhullaṃ āpattiṃ aduṭṭhullā āpattīti dīpeti aduṭṭhullaṃ āpattiṃ duṭṭhullā āpattīti dīpeti evaṃ laddhapakkhomhīti paraṃ pakkhaṃ avajānāti.

[1113] Kathaṃ bahussutomhīti appassutaṃ avajānāti . Idhekacco bahussuto hoti sutadharo sutasannicayo ayaṃ appassuto appāgamo appadharoti tassa avajānanto adhammaṃ dhammoti dīpeti dhammaṃ adhammoti dīpeti .pe. duṭṭhullaṃ āpattiṃ aduṭṭhullā āpattīti dīpeti aduṭṭhullaṃ āpattiṃ duṭṭhullā āpattīti dīpeti evaṃ bahussutomhīti appassutaṃ avajānāti.

[1114] Kathaṃ therataromhīti navakataraṃ avajānāti . idhekacco thero hoti rattaññū cirapabbajito ayaṃ navako appaññāto appassuto appakataññū imassa vacanaṃ akataṃ bhavissatīti tassa avajānanto adhammaṃ dhammoti dīpeti dhammaṃ adhammoti Dīpeti .pe. duṭṭhullaṃ āpattiṃ aduṭṭhullā āpattīti dīpeti aduṭṭhullaṃ āpattiṃ duṭṭhullā āpattīti dīpeti evaṃ therataromhīti navakataraṃ avajānāti.

[1115] Asampattaṃ na byāharitabbanti anotiṇṇaṃ bhāsaṃ na otāretabbaṃ . sampattaṃ dhammato vinayato na parihāpetabbanti yaṃ atthāya saṅgho sannipatito hoti taṃ atthaṃ dhammato vinayato na parihāpetabbaṃ.