[1128] Nimittakammaṃ nāma nimittaṃ karoti iminā dussena kaṭhinaṃ attharissāmīti . parikathā nāma parikathaṃ karoti imāya parikathāya kaṭhinadussaṃ nibbattessāmīti . kukkukataṃ nāma anādiyadānaṃ vuccati . sannidhi nāma dve sannidhiyo karaṇasannidhi ca nicayasannidhi ca . nissaggiyaṃ nāma kayiramāne aruṇaṃ udriyati . Imehi catuvīsatiyā ākārehi anatthataṃ hoti kaṭhinaṃ.

[1129] Kinti kaṭhinaṃ atthatanti sattarasahi ākārehi atthataṃ hoti kaṭhinaṃ ahatena atthataṃ hoti kaṭhinaṃ ahatakappena atthataṃ hoti kaṭhinaṃ pilotikāya atthataṃ hoti kaṭhinaṃ paṃsukūlena atthataṃ hoti kaṭhinaṃ pāpaṇikena atthataṃ hoti kaṭhinaṃ animittakatena Atthataṃ hoti kaṭhinaṃ aparikathākatena atthataṃ hoti kaṭhinaṃ akukkukatena atthataṃ hoti kaṭhinaṃ asannidhikatena atthataṃ hoti kaṭhinaṃ anissaggiyena atthataṃ hoti kaṭhinaṃ kappakatena atthataṃ hoti kaṭhinaṃ saṅghāṭiyā atthataṃ hoti kaṭhinaṃ uttarāsaṅgena atthataṃ hoti kaṭhinaṃ antaravāsakena atthataṃ hoti kaṭhinaṃ pañcakena vā atirekapañcakena vā tadaheva sañchinnena samaṇḍalīkatena atthataṃ hoti kaṭhinaṃ puggalassa atthārā atthataṃ hoti kaṭhinaṃ sammā ceva atthataṃ hoti kaṭhinaṃ tañce sīmaṭṭho anumodati . evampi atthataṃ hoti kaṭhinaṃ. Imehi sattarasahi ākārehi atthataṃ hoti kaṭhinaṃ.

[1130] Saha kaṭhinassa atthārā kati dhammā jāyanti . saha kaṭhinassa atthārā paṇṇarasa dhammā jāyanti aṭṭha mātikā dve palibodhā pañca ānisaṃsā . saha kaṭhinassa atthārā ime paṇṇarasa dhammā jāyanti.

[1131] Payogassa katame dhammā anantarapaccayena paccayo samanantarapaccayena paccayo nissayapaccayena paccayo upanissayapaccayena paccayo purejātapaccayena paccayo pacchājātapaccayena paccayo sahajātapaccayena paccayo . pubbakaraṇassa .pe. Paccuddhārassa adhiṭṭhānassa atthārassa mātikānañca palibodhānañca vatthussa katame dhammā anantarapaccayena paccayo samanantarapaccayena paccayo nissayapaccayena paccayo upanissayapaccayena Paccayo purejātapaccayena paccayo pacchājātapaccayena paccayo sahajātapaccayena paccayo.