[1139] Pubbakaraṇaṃ katīhi dhammehi saṅgahitaṃ . pubbakaraṇaṃ sattahi dhammehi saṅgahitaṃ dhovanena vicāraṇena chedanena bandhanena sibbanena rajanena kappakaraṇena . pubbakaraṇaṃ imehi sattahi dhammehi saṅgahitaṃ . paccuddhāro katīhi dhammehi saṅgahito . Paccuddhāro tīhi dhammehi saṅgahito saṅghāṭiyā uttarāsaṅgena antaravāsakena . adhiṭṭhānaṃ katīhi dhammehi saṅgahitaṃ . adhiṭṭhānaṃ tīhi dhammehi saṅgahitaṃ saṅghāṭiyā uttarāsaṅgena antaravāsakena . Atthāro katīhi dhammehi saṅgahito . atthāro Ekena dhammena saṅgahito vacībhedena.

[1140] Kaṭhinassa kati mūlāni kati vatthūni kati bhūmiyo. Kaṭhinassa ekaṃ mūlaṃ saṅgho . tīṇi vatthūni saṅghāṭi uttarāsaṅgo antaravāsako. Cha bhūmiyo khomaṃ kappāsikaṃ koseyyaṃ kambalaṃ sāṇaṃ bhaṅgaṃ.

[1141] Kaṭhinassa ko ādi kiṃ majjhe kiṃ pariyosānaṃ . Kaṭhinassa pubbakaraṇaṃ ādi kiriyā majjhe atthāro pariyosānaṃ.

[1142] Katīhaṅgehi samannāgato puggalo abhabbo kaṭhinaṃ attharituṃ katīhaṅgehi samannāgato puggalo bhabbo kaṭhinaṃ attharituṃ . Aṭṭhahaṅgehi samannāgato puggalo abhabbo kaṭhinaṃ attharituṃ . Aṭṭhahaṅgehi samannāgato puggalo bhabbo kaṭhinaṃ attharituṃ katamehi aṭṭhahaṅgehi samannāgato puggalo abhabbo kaṭhinaṃ attharituṃ . Pubbakaraṇaṃ na jānāti paccuddhāraṃ na jānāti adhiṭṭhānaṃ na jānāti atthāraṃ na jānāti mātikaṃ na jānāti palibodhaṃ na jānāti uddhāraṃ na jānāti ānisaṃsaṃ na jānāti . imehi aṭṭhahaṅgehi samannāgato puggalo abhabbo kaṭhinaṃ attharituṃ . Katamehi aṭṭhahaṅgehi samannāgato puggalo bhabbo kaṭhinaṃ attharituṃ . Pubbakaraṇaṃ jānāti paccuddhāraṃ jānāti adhiṭṭhānaṃ jānāti atthāraṃ jānāti mātikaṃ jānāti palibodhaṃ jānāti uddhāraṃ jānāti ānisaṃsaṃ jānāti . imehi aṭṭhahaṅgehi samannāgato puggalo bhabbo kaṭhinaṃ attharituṃ.