[1172] Kati nu kho bhante adhammikā diṭṭhāvikammāti . Pañcime upāli adhammikā diṭṭhāvikammā . katame pañca . Anāpattiyā diṭṭhiṃ āvikaroti adesanāgāminiyā āpattiyā diṭṭhiṃ āvikaroti desitāya āpattiyā diṭṭhiṃ āvikaroti catūhi pañcahi diṭṭhiṃ āvikaroti manomānasena diṭṭhiṃ āvikaroti . ime kho upāli pañca adhammikā diṭṭhāvikammā . pañcime upāli dhammikā diṭṭhāvikammā . katame pañca . āpattiyā diṭṭhiṃ āvikaroti desanāgāminiyā āpattiyā diṭṭhiṃ āvikaroti adesitāya āpattiyā diṭṭhiṃ āvikaroti na catūhi pañcahi diṭṭhiṃ āvikaroti na manomānasena diṭṭhiṃ āvikaroti . ime kho upāli pañca dhammikā diṭṭhāvikammā . aparepi upāli pañca adhammikā diṭṭhāvikammā . Katame pañca . nānāsaṃvāsakassa santike diṭṭhiṃ āvikaroti nānāsīmāya ṭhitassa santike diṭṭhiṃ āvikaroti apakatattassa santike diṭṭhiṃ āvikaroti catūhi pañcahi diṭṭhiṃ āvikaroti manomānasena diṭṭhiṃ āvikaroti . ime kho upāli pañca adhammikā diṭṭhāvikammā . pañcime upāli dhammikā diṭṭhāvikammā . katame pañca . samānasaṃvāsakassa santike diṭṭhiṃ āvikaroti samānasīmāya ṭhitassa santike diṭṭhiṃ āvikaroti pakatattassa santike diṭṭhiṃ āvikaroti na catūhi pañcahi diṭṭhiṃ āvikaroti na manomānasena diṭṭhiṃ āvikaroti. Ime kho upāli pañca dhammikā diṭṭhāvikammāti.

[1173] Kati nu kho bhante adhammikā paṭiggahāti . pañcime upāli adhammikā paṭiggahā . katame pañca . kāyena dīyamānaṃ kāyena appaṭiggahitaṃ kāyena dīyamānaṃ kāyapaṭibaddhena appaṭiggahitaṃ kāyapaṭibaddhena dīyamānaṃ kāyena appaṭiggahitaṃ kāyapaṭibaddhena dīyamānaṃ kāyapaṭibaddhena appaṭiggahitaṃ nissaggiyena dīyamānaṃ kāyena vā kāyapaṭibaddhena vā appaṭiggahitaṃ . ime kho upāli pañca adhammikā paṭiggahā . pañcime upāli dhammikā paṭiggahā . Katame pañca . kāyena dīyamānaṃ kāyena paṭiggahitaṃ kāyena dīyamānaṃ kāyapaṭibaddhena paṭiggahitaṃ kāyapaṭibaddhena dīyamānaṃ kāyena paṭiggahitaṃ kāyapaṭibaddhena dīyamānaṃ kāyapaṭibaddhena paṭiggahitaṃ nissaggiyena dīyamānaṃ kāyena vā kāyapaṭibaddhena vā paṭiggahitaṃ . Ime kho upāli pañca dhammikā paṭiggahāti.