[1177] Katīhi nu kho bhante aṅgehi samannāgatassa bhikkhuno okāsakammaṃ kārāpentassa nālaṃ okāsakammaṃ kātunti . pañcahupāli aṅgehi samannāgatassa bhikkhuno okāsakammaṃ kārāpentassa nālaṃ okāsakammaṃ kātuṃ . katamehi pañcahi . alajjī ca hoti bālo ca apakatatto ca cāvanādhippāyo vattā hoti no vuṭṭhānādhippāyo . imehi kho upāli pañcahaṅgehi samannāgatassa Bhikkhuno okāsakammaṃ kārāpentassa nālaṃ okāsakammaṃ kātuṃ . Pañcahupāli aṅgehi samannāgatassa bhikkhuno okāsakammaṃ kārāpentassa alaṃ okāsakammaṃ kātuṃ . katamehi pañcahi . lajjī ca hoti paṇḍito ca pakatatto ca vuṭṭhānādhippāyo vattā hoti no cāvanādhippāyo . imehi kho upāli pañcahaṅgehi samannāgatassa bhikkhuno okāsakammaṃ kārāpentassa alaṃ okāsakammaṃ kātunti.
[1178] Katīhi nu kho bhante aṅgehi samannāgatena bhikkhunā saddhiṃ vinayo na sākacchātabboti . pañcahupāli aṅgehi samannāgatena bhikkhunā saddhiṃ vinayo na sākacchātabbo . katamehi pañcahi . vatthuṃ na jānāti nidānaṃ na jānāti paññattiṃ na jānāti padapacchābhaṭṭhaṃ na jānāti anusandhivacanapathaṃ na jānāti . Imehi kho upāli pañcahaṅgehi samannāgatena bhikkhunā saddhiṃ vinayo na sākacchātabbo . pañcahupāli aṅgehi samannāgatena bhikkhunā saddhiṃ vinayo sākacchātabbo . katamehi pañcahi . Vatthuṃ jānāti nidānaṃ jānāti paññattiṃ jānāti padapacchābhaṭṭhaṃ jānāti anusandhivacanapathaṃ jānāti . imehi kho upāli pañcahaṅgehi samannāgatena bhikkhunā saddhiṃ vinayo sākacchātabboti.
[1179] Kati nu kho bhante pañhapucchāti . Pañcimā upāli pañhapucchā . katamā pañca . mandattā momūhattā pañhaṃ pucchati pāpiccho icchāpakato pañhaṃ pucchati paribhavā pañhaṃ Pucchati aññātukāmo pañhaṃ pucchati sace me pañhaṃ puṭṭho sammadeva byākarissati iccetaṃ kusalaṃ no ce me pañhaṃ puṭṭho sammadeva byākarissati ahamassa sammadeva byākarissāmīti pañhaṃ pucchati . imā kho upāli pañca pañhapucchāti . kati nu kho bhante aññabyākaraṇāti . pañcime upāli aññabyākaraṇā . Katame pañca . mandattā momūhattā aññaṃ byākaroti pāpiccho icchāpakato aññaṃ byākaroti ummādā cittakkhepā aññaṃ byākaroti adhimānena aññaṃ byākaroti bhūtaṃ aññaṃ byākaroti. Ime kho upāli pañca aññabyākaraṇāti.