[1196] Katīhi nu kho bhante ākārehi bhikkhu āpattiṃ āpajjatīti . pañcahupāli ākārehi bhikkhu āpattiṃ āpajjati . Katamehi pañcahi . alajjitā aññāṇatā kukkuccapakatatā akappiye kappiyasaññitā kappiye akappiyasaññitā . imehi kho upāli pañcahākārehi bhikkhu āpattiṃ āpajjati . aparehipi upāli pañcahākārehi bhikkhu āpattiṃ āpajjati . katamehi Pañcahi . adassanena assavanena pasuttatā tathāsaññī satisammosā . imehi kho upāli pañcahākārehi bhikkhu āpattiṃ āpajjatīti.

[1197] Kati nu kho bhante verāti . pañcime upāli verā . katame pañca . pāṇātipāto adinnādānaṃ kāmesu micchācāro musāvādo surāmerayamajjapamādaṭṭhānaṃ . imehi kho upāli pañca verāti.

[1198] Kati nu kho bhante veramaṇiyoti . pañcimā upāli veramaṇiyo . katamā pañca . pāṇātipātā veramaṇī adinnādānā veramaṇī kāmesu micchācārā veramaṇī musāvādā veramaṇī surāmerayamajjapamādaṭṭhānā veramaṇī . imā kho upāli pañca veramaṇiyoti.

[1199] Kati nu kho bhante byasanānīti . pañcimāni upāli byasanāni . katamāni pañca . ñātibyasanaṃ bhogabyasanaṃ rogabyasanaṃ sīlabyasanaṃ diṭṭhibyasanaṃ. Imāni kho upāli pañca byasanānīti.