[1212] Katīhi nu kho bhante ākārehi saṅgho bhijjatīti . Pañcahupāli ākārehi saṅgho bhijjati . katamehi pañcahi . Kammena uddesena voharanto anussāvanena salākagāhena . Imehi kho upāli pañcahākārehi saṅgho bhijjatīti.

[1213] Saṅgharājīti bhante vuccati kittāvatā nu kho bhante saṅgharāji hoti no ca saṅghabhedo kittāvatā ca pana saṅgharāji ceva hoti saṅghabhedo cāti . paññattetaṃ upāli mayā āgantukānaṃ bhikkhūnaṃ āgantukavattaṃ evaṃ suppaññatte kho upāli mayā sikkhāpade āgantukā bhikkhū āgantukavatte na vattanti evampi kho upāli saṅgharāji hoti no ca saṅghabhedo . paññattetaṃ upāli mayā āvāsikānaṃ bhikkhūnaṃ āvāsikavattaṃ evaṃ suppaññatte kho upāli mayā sikkhāpade āvāsikā bhikkhū āvāsikavatte na vattanti evampi kho upāli saṅgharāji hoti no ca saṅghabhedo . Paññattetaṃ upāli mayā bhikkhūnaṃ bhattagge bhattaggavattaṃ yathāvuḍḍhaṃ yathārattaṃ yathāpaṭirūpaṃ aggāsanaṃ aggodakaṃ aggapiṇḍaṃ evaṃ suppaññatte kho upāli mayā sikkhāpade navā bhikkhū bhattagge therānaṃ bhikkhūnaṃ āsanaṃ paṭibāhanti evampi kho upāli saṅgharāji hoti no ca saṅghabhedo. {1213.1} Paññattetaṃ upāli mayā bhikkhūnaṃ Senāsane senāsanavatataṃ yathāvuḍḍhaṃ yathārattaṃ yathāpaṭirūpaṃ evaṃ suppaññatte kho upāli mayā sikkhāpade navā bhikkhū therānaṃ bhikkhūnaṃ senāsanaṃ paṭibāhanti evampi kho upāli saṅgharāji hoti no ca saṅghabhedo . paññattetaṃ upāli mayā bhikkhūnaṃ antosīmāya ekaṃ uposathaṃ ekaṃ pavāraṇaṃ ekaṃ saṅghakammaṃ ekaṃ kammākammaṃ evaṃ suppaññatte kho upāli mayā sikkhāpade tattheva antosīmāya āveṇibhāvaṃ karitvā gaṇaṃ bandhitvā āveṇi uposathaṃ karonti āveṇi pavāraṇaṃ karonti āveṇi saṅghakammaṃ karonti āveṇi kammākammāni karonti evampi kho upāli saṅgharāji ceva hoti saṅghabhedo cāti. Adhikaraṇavūpasamavaggo dasamo. Tassuddānaṃ

[1214] Āpatti adhikaraṇaṃ chandā appassutena ca vatthuñca akusalo ca puggalo āmisena ca bhijjati saṅgharāji ca saṅghabhedo tatheva cāti.