[1230] Atthāpatti acittako āpajjati sacittako vuṭṭhāti atthāpatti sacittako āpajjati acittako vuṭṭhāti atthāpatti acittako āpajjati acittako vuṭṭhāti atthāpatti sacittako āpajjati sacittako vuṭṭhāti . atthāpatti kusalacitto āpajjati kusalacitto vuṭṭhāti atthāpatti kusalacitto āpajjati akusalacitto vuṭṭhāti atthāpatti kusalacitto āpajjati abyākatacitto vuṭṭhāti atthāpatti akusalacitto āpajjati kusalacitto vuṭṭhāti atthāpatti akusalacitto āpajjati akusalacitto vuṭṭhāti atthāpatti akusalacitto āpajjati abyākatacitto vuṭṭhāti . atthāpatti abyākatacitto āpajjati kusalacitto vuṭṭhāti atthāpatti abyākatacitto āpajjati akusalacitto vuṭṭhāti atthāpatti abyākatacitto āpajjati abyākatacitto vuṭṭhāti.

[1231] Paṭhamaṃ pārājikaṃ katīhi samuṭṭhānehi samuṭṭhāti . Paṭhamaṃ pārājikaṃ ekena samuṭṭhānena samuṭṭhāti kāyato ca cittato ca samuṭṭhāti na vācato . dutiyaṃ pārājikaṃ katīhi samuṭṭhānehi samuṭṭhāti . dutiyaṃ pārājikaṃ tīhi samuṭṭhānehi samuṭṭhāti siyā kāyato ca cittato ca samuṭṭhāti na vācato siyā vācato ca cittato ca samuṭṭhāti na kāyato siyā kāyato Ca vācato ca cittato ca samuṭṭhāti . tatiyaṃ pārājikaṃ katīhi samuṭṭhānehi samuṭṭhāti . tatiyaṃ pārājikaṃ tīhi samuṭṭhānehi samuṭṭhāti siyā kāyato ca cittato ca samuṭṭhāti na vācato siyā vācato ca cittato ca samuṭṭhāti na kāyato siyā kāyato ca vācato ca cittato ca samuṭṭhāti . catutthaṃ pārājikaṃ katīhi samuṭṭhānehi samuṭṭhāti . catutthaṃ pārājikaṃ tīhi samuṭṭhānehi samuṭṭhāti siyā kāyato ca cittato ca samuṭṭhāti na vācato siyā vācato ca cittato ca samuṭṭhāti na kāyato siyā kāyato ca vācato ca cittato ca samuṭṭhāti. Cattāro pārājikā niṭṭhitā.

[1232] Upakkamitvā asuciṃ mocentassa saṅghādiseso katīhi samuṭṭhānehi samuṭṭhāti . upakkamitvā asuciṃ mocentassa saṅghādiseso ekena samuṭṭhānena samuṭṭhāti kāyato ca cittato ca samuṭṭhāti na vācato. {1232.1} Mātugāmena saddhiṃ kāyasaṃsaggaṃ samāpajjantassa saṅghādiseso katīhi samuṭṭhānehi samuṭṭhāti . mātugāmena saddhiṃ kāyasaṃsaggaṃ samāpajjantassa saṅghādiseso ekena samuṭṭhānena samuṭṭhāti kāyato ca cittato ca samuṭṭhāti na vācato. {1232.2} Mātugāmaṃ duṭṭhullāhi vācāhi obhāsantassa saṅghādiseso katīhi samuṭṭhānehi samuṭṭhāti . mātugāmaṃ duṭṭhullāhi vācāhi obhāsantassa saṅghādiseso tīhi samuṭṭhānehi samuṭṭhāti siyā kāyato Ca cittato ca samuṭṭhāti na vācato siyā vācato ca cittato ca samuṭṭhāti na kāyato siyā kāyato ca vācato ca cittato ca samuṭṭhāti. {1232.3} Mātugāmassa santike attakāmapāricariyāya vaṇṇaṃ bhāsantassa saṅghādiseso katīhi samuṭṭhānehi samuṭṭhāti . mātugāmassa santike attakāmapāricariyāya vaṇṇaṃ bhāsantassa saṅghādiseso tīhi samuṭṭhānehi samuṭṭhāti .pe. {1232.4} Sañcarittaṃ samāpajjantassa saṅghādiseso katīhi samuṭṭhānehi samuṭṭhāti . sañcarittaṃ samāpajjantassa saṅghādiseso chahi samuṭṭhānehi samuṭṭhāti siyā kāyato samuṭṭhāti na vācato na cittato siyā vācato samuṭṭhāti na kāyato na cittato siyā kāyato ca vācato ca samuṭṭhāti na cittato siyā kāyato ca cittato ca samuṭṭhāti na vācato siyā vācato ca cittato ca samuṭṭhāti na kāyato siyā kāyato ca vācato ca cittato ca samuṭṭhāti. {1232.5} Saññācikāya kuṭiṃ kārāpentassa saṅghādiseso katīhi samuṭṭhānehi samuṭṭhāti . saññācikāya kuṭiṃ kārāpentassa saṅghādiseso chahi samuṭṭhānehi samuṭṭhāti .pe. mahallakaṃ vihāraṃ kārāpentassa saṅghādiseso katīhi samuṭṭhānehi samuṭṭhāti. {1232.6} Mahallakaṃ vihāraṃ kārāpentassa saṅghādiseso chahi samuṭṭhānehi samuṭṭhāti .pe. bhikkhuṃ amūlakena pārājikena dhammena anuddhaṃsentassa saṅghādiseso katīhi samuṭṭhānehi samuṭṭhāti. {1232.7} Bhikkhuṃ amūlakena pārājikena dhammena anuddhaṃsentassa saṅghādiseso tīhi Samuṭṭhānehi samuṭṭhāti .pe. bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsentassa saṅghādiseso katīhi samuṭṭhānehi samuṭṭhāti. {1232.8} Bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsentassa saṅghādiseso tīhi samuṭṭhānehi samuṭṭhāti .pe. {1232.9} Saṅghabhedakassa bhikkhuno yāvatatiyaṃ samanubhāsanāya nappaṭinissajjantassa saṅghādiseso katīhi samuṭṭhānehi samuṭṭhāti . Saṅghabhedakassa bhikkhuno yāvatatiyaṃ samanubhāsanāya nappaṭinissajjantassa saṅghādiseso ekena samuṭṭhānena samuṭṭhāti kāyato ca vācato ca cittato ca samuṭṭhāti. {1232.10} Bhedānuvattakānaṃ bhikkhūnaṃ yāvatatiyaṃ samanubhāsanāya nappaṭinissajjantānaṃ saṅghādiseso katīhi samuṭṭhānehi samuṭṭhāti . Bhedānuvattakānaṃ bhikkhūnaṃ yāvatatiyaṃ samanubhāsanāya nappaṭinissajjantānaṃ saṅghādiseso ekena samuṭṭhānena samuṭṭhāti kāyato ca vācato ca cittato ca samuṭṭhāti. {1232.11} Dubbacassa bhikkhuno yāvatatiyaṃ samanubhāsanāya nappaṭinissajjantassa saṅghādiseso katīhi samuṭṭhānehi samuṭṭhāti . Dubbacassa bhikkhuno yāvatatiyaṃ samanubhāsanāya nappaṭinissajjantassa saṅghādiseso ekena samuṭṭhānena samuṭṭhāti kāyato ca vācato ca cittato ca samuṭṭhāti. {1232.12} Kuladūsakassa bhikkhuno yāvatatiyaṃ samanubhāsanāya nappaṭinissajjantassa saṅghādiseso katīhi samuṭṭhānehi samuṭṭhāti . Kuladūsakassa bhikkhuno yāvatatiyaṃ Samanubhāsanāya nappaṭinissajjantassa saṅghādiseso ekena samuṭṭhānena samuṭṭhāti kāyato ca vācato ca cittato ca samuṭṭhāti. Terasa saṅghādisesā niṭṭhitā.