[1246] Kati vācasikā rattiṃ kati vācasikā divā dadamānassa kati āpattiyo paṭiggaṇhantassa kittakā. Dve vācasikā rattiṃ dve vācasikā divā dadamānassa tisso āpattiyo cattāro ca paṭiggahe.

[1247] Kati desanāgāminiyo kati sappaṭikammā katā katettha appaṭikammā vuttā buddhenādiccabandhunā. Pañca desanāgāminiyo cha sappaṭikammā katā ekettha appaṭikammā vuttā buddhenādiccabandhunā.

[1248] Vinayagarukā kati vuttā kāyavācasikāni ca kati vikāle dhaññarasā kati ñatticatutthena sammati. Vinayagarukā dve vuttā kāyavācasikāni ca eko vikāle dhaññaraso ekā ñatticatutthena sammati.

[1249] Pārājikā kāyikā kati kati saṃvāsakabhūmiyo katīnañca ratticchedo paññattā dvaṅgulā kati. Pārājikā kāyikā dve dve saṃvāsakabhūmiyo dvinnañca ratticchedo paññattā dvaṅgulā duve.