[1250] Katattānaṃ vadhitvāna katīhi saṅgho bhijjati katettha paṭhamāpattikā ñattiyā karaṇā kati. Dve attānaṃ vadhitvāna dvīhi saṅgho bhijjati dvettha paṭhamāpattikā ñattiyā karaṇā duve.

[1251] Pāṇātipāte kati āpattiyo vācā pārājikā kati Obhāsanā kati vuttā sañcarittena vā kati. Pāṇātipāte tisso āpattiyo vācā pārājikā tayo obhāsanā tayo vuttā sañcarittena vā tayo.

[1252] Kati puggalā na upasampādetabbā katī kammāna saṅgahā nāsitakā kati vuttā katīnaṃ ekavācikā. Tayo puggalā na upasampādetabbā tayo kammāna saṅgahā nāsitakā tayo vuttā tiṇṇannaṃ ekavācikā.

[1253] Adinnādāne kati āpattiyo kati methunapaccayā chindantassa kati āpattiyo kati chaḍḍitapaccayā. Adinnādāne tisso āpattiyo catasso methunapaccayā chindantassa tisso āpattiyo pañca chaḍḍitapaccayā.