[1266] Kati kāyikā rattiṃ kati kāyikā divā nijjhantassa kati āpatti kati piṇḍapātapaccayā. Dve kāyikā rattiṃ dve kāyikā divā nijjhantassa ekā āpatti ekā piṇḍapātapaccayā.

[1267] Katānisaṃse sampassaṃ paresaṃ saddhāya desaye ukkhittakā kati vuttā kati sammāpavattanā aṭṭhānisaṃse sampassaṃ paresaṃ saddhāya desaye ukkhittakā tayo vuttā tecattāḷīsa sammāvattanā.

[1268] Katiṭhāne musāvādo kati paramanti vuccati kati pāṭidesanīyā katīnaṃ desanāya ca. Pañcaṭhāne musāvādo cuddasa paramanti vuccati dvādasa pāṭidesanīyā catunnaṃ desanāya ca.

[1269] Kataṅgiko musāvādo kati uposathaṅgāni kati dūteyyaṅgāni kati titthiyavattanā. Aṭṭhaṅgiko musāvādo aṭṭha uposathaṅgāni aṭṭha dūteyyaṅgāni aṭṭha titthiyavattanā.