[1270] Kativācikā upasampadā katīnaṃ paccuṭṭhātabbaṃ katīnaṃ āsanaṃ dātabbaṃ bhikkhunovādako katīhi. Aṭṭhavācikā upasampadā aṭṭhannaṃ paccuṭṭhātabbaṃ Aṭṭhannaṃ āsanaṃ dātabbaṃ bhikkhunovādako aṭṭhahi.

[1271] Katīnaṃ chejjaṃ hoti katīnaṃ thullaccayaṃ katīnañceva anāpatti sabbesaṃ ekavatthukā. Ekassa chejjaṃ hoti catunnaṃ thullaccayaṃ catunnañceva anāpatti sabbesaṃ ekavatthukā.

[1272] Kati āghātavatthūni katīhi saṅgho bhijjati katettha paṭhamāpattikā ñattiyā karaṇā kati. Nava āghātavatthūni navahi saṅgho bhijjati navettha paṭhamāpattikā ñattiyā karaṇā nava.

[1273] Kati puggalā nābhivādetabbā añjalisāmicena ca katīnaṃ dukkaṭaṃ hoti kati cīvaradhāraṇā. Dasa puggalā nābhivādetabbā añjalisāmicena ca dasannaṃ dukkaṭaṃ hoti dasa cīvaradhāraṇā.