[1274] Katīnaṃ vassaṃ vutthānaṃ dātabbaṃ idha cīvaraṃ katīnaṃ sante dātabbaṃ katīnañceva na dātabbaṃ. Pañcannaṃ vassaṃ vutthānaṃ dātabbaṃ idha cīvaraṃ sattannaṃ sante dātabbaṃ soḷasannaṃ na dātabbaṃ.

[1275] Katisataṃ rattisataṃ āpattiṃ chādayitvāna kati rattiyo vasitvāna mucceyya pārivāsiko. Dasasataṃ rattisataṃ āpattiṃ chādayitvāna Dasa rattiyo vasitvāna mucceyya pārivāsiko.

[1276] Kati kammadosā vuttā buddhenādiccabandhunā campāyaṃ vinayavatthusmiṃ sabbe adhammikā kati. Dvādasa kammadosā vuttā buddhenādiccabandhunā campāyaṃ vinayavatthusmiṃ sabbe adhammikā katā.

[1277] Kati kammasampattiyo vuttā buddhenādiccabandhunā campāyaṃ vinayavatthusmiṃ sabbe va dhammikā kati. Catasso kammasampattiyo vuttā buddhenādiccabandhunā campāyaṃ vinayavatthusmiṃ sabbe va dhammikā katā.